भगवान बुद्धको उपर्युक्त शिक्षाप्रति मानव समुदायको ध्यानाकर्षण गराउँनु आजको प्रमुख आवश्यकता हो । आजको मानिस व्यक्तिगत आचरणमा, पारिवारिक सम्बन्धमा, सामाजिक व्यवहारमा तथा राष्ट्रिय दायित्व निर्वाहमा पथभ्रान्त एवं विपथगामी हुँदै गएको छ । फलस्वरुप युवा यवतीहरु अपराध उन्मुख आचरणमा फँसिरहेका छन् , पारिवारिक सम्बन्ध चिसो हुँदै गएको छ । सामाजिक व्यवहार विभेदपूणर््ा,शोषणमूलक तथा विरानो हुँदै गएको छ । राष्ट्रिय जनजीवन अराजक, अराष्ट्रिय , भ्रष्ट तथा आपरधिक चक्रव्यूहमा फँसिरहेको छ । अहिले हरेक समस्याको समाधान हिंसात्मक तरीकाले खोज्न थालिएको छ ।
हरेक व्यक्ति भित्र एउटा न एउटा द्वन्द्वले एकातिर उत्तेजना,उपभोग र उन्माद पैदा गरेको छ भने अर्कातिर घोर कुण्ठा, विषाद र निराशा उत्पन्न गरेको छ । को कता गइरहेको छ, कसको स्वार्थ कोसँग बाझिएको छ , कसले कतिबेला के गर्दछ र कहाँ के कस्तो घटना घट्छ कसैले केही भन्न सक्दैन । कसैले कसैको विश्वास गर्न सक्दैन । कोही कसैबाट सुरक्षित छैन । संस्कृति, सभ्यता, सेवा, साधना र संस्कार तथा नैतिकता, सदाचार एवं श्रद्धा सम्मानजस्ता मूल्य मान्यताहरु सवै उपेक्षित र तिरस्कृत भएका छन् या त व्यापारिक विनिमयका विषयवस्तु बनेका छन् । स्नेह,ममता,प्रेम र वात्सल्य जस्ता संवेगहरु स्वार्थप्रेरित तथा देखावटी र अभिनयमूलक प्रस्तुतिमा फेरिएका छन् । संक्षेपमा आजको मानिस आफ्नो सत्व र मनुष्यत्व गुमाउँदै गइरहेको छ तर यो तथ्यप्रति ऊ स्वयं जिम्मेवार छ भन्ने कुरामा अझै सहमत हुन आनाकानी गरिरहेकोछ । यसको परिणाम मानव समुदायको अवनति र अहित हुने सुनिश्चित छ ।
“जसको मन बहिरी सौन्दर्य र वैभवको खोजीमा भौँतारिन्छ , जो आफ्ना इन्द्रियमाथि मालिकले झैँ नियन्त्रण गर्न सक्दैन जो अशुद्ध भोजन गर्दछ, जो अल्छी छ , साहसहीन छ, त्यसलाई अज्ञानरुपी दुःखले त्यसरी नै नष्ट गरिदिन्छ जसरी आँधीले सुकेका रुखहरुलाई नष्ट गरिदिन्छ ।” भगवान बुद्ध
संसारमा हरेक कार्यको कारण हुन्छ । अविकसित एवं असंयमित मनकै कारण समस्या उत्पन्न हुन्छ । सयमित र विकसित मनद्वारा नै समस्याको समाधान हुन्छ । मनलाई विकसित पार्न ध्यानको अभ्यास गर्नु पर्दछ । समस्या भन्नु नै दुःख हो र दुःखको कारण हुन्छ । ती कारणहरु धैरै हुन्छन् ती मध्ये भगवान बुद्धले संकेत गर्नुभएका निम्नलिखित कारणहरुको निवारणमा ध्यान दिनु आवश्यक छ जुन यस लेखको आरम्भमै उद्धृत प्रसिद्ध बौद्ध ग्रन्थ धम्मपदका पदावलीको सूक्ष्म अनुशीलन गर्ने हो भने ती वाक्यहरु अत्यन्त मनन योग्य तथा ग्रहणयोग्य रहेका देखिन्छन् । तदनुसार: ती यस प्रकारका छन् ।
१. जसको मन बाहिरी सौन्दर्य र वैभवको खोजीमा भौँतारिन्छ ।
२. जो आफ्ना इन्द्रियमाथि मालिकले झैँ नियन्त्रण गर्न सक्दैन ।
३ं जो अशुद्ध भोजन गर्दछ ।
४. जो अल्छी छ ।
५. जो साहस हीन छ ।
उपर्युक्त कारणहरुको यहाँ व्याख्या गरिरहनु पर्दैन जुन आफैँमा प्रष्ट छन् र सबैले बुझने भाषामा व्यक्त गरिएका छन् । यदि मानिसले शारीरिक , भौतिक र कृत्रिम सौन्दर्यसंगै आन्तरिक सौन्दर्यको पनि पहिचान गर्दथ्यो भने उसले संंसारका प्रत्येक सिर्जनामा सुन्दरता मात्र देख्ने थियो । कुरुपताप्रति उसको मनमा कसैमाथि घृणाभाव जागृत हुने थिएन । यदि मानिसले बुद्धि, विवेक, बोधी, मैत्री र करुणालाई नै वैभव मान्दथ्यो भने तुच्छ भोगविलासका निम्ति लुछाचूँडी र हत्या हिंसामा संलग्न हुने थिएन । यदि मानिसले आफ्ना इन्द्रियमाथि नियन्त्रण राख्न सक्थ्यो भने कामवासना, क्रोध, लोभ, मोह, मद र मात्सर्यजस्ता षडरिपुद्वारा समाजलाई आक्रान्त पार्ने थिएन ।
आज मानिसले मानिसमाथि जे जति दुव्र्यवहार गर्दै आइरहेको छ र आफैँले आफूलाई जसरी विभिन्न रोगव्याधि र पीडाग्रस्त तुल्याइरहेको छ त्यसको प्रमुख कारण अशुद्ध भोजनको दुष्प्रभाव नै हो । आज आफ्नै घरमा भोजन बनाएर खाने चलन हराउँदै गएको छ । होटल तथा रेष्टूँरा र सडकमा खाने प्रचलन बढ्रदैगएको छ । सडकमै खाउँ, सडकमै रमाउँ, सडकमै सुतौँ भन्ने आह्वान आजको नगरसभ्यताको परिचायक भईसकेको छ ।
भोजन पनि बासी, सडे गलेको जंकफूड खाने प्रवृत्ति व्यापक हुदै छ । धूम्रपान, मद्यपान, लागुपदार्थ दुव्र्यसन र अखाद्य पदार्थको मिसावटद्वारा अत्याधुनिक मेसिनमा तयार परिएका तयारी मिष्टान्नहरु सहित मांसाहार तथा बोतबन्द र प्याकेटका पेयपदार्थको सेवन गर्ने प्रवृत्तिले गर्दा मानिस पनि एउटा मेसिनजस्तै हुन पुगेको छ । मानिसको पेट एउटा डम्पिङसाइटमा परिणत भइसकेको छ । हाम्रा साना साना नानीहरुलाई अब घरमा बनाएको खाना पटक्कै मन पर्न छोडिसकेको छ ।
अर्को ध्यान दिनु पर्ने कुरा आजको मानिसमा आलस्यको मात्रा क्रमिक रुपले बढ्दै गइरहेको छ । कार्यमा मन लगाउनै कठिन, मन लगाएको केहीबेरमै कार्यमा शिथिलता बढ्दैजाने र विश्रामको खोजीगर्ने प्रवृत्ति खासगरी युवा वर्गमा देखा परेको कुरा अध्ययनले बताएको छ । आज विद्यार्थीको पढाइमा आलस्य बढेको छ । कर्मचारीतन्त्रमा त आलस्यको रोग धेरै पुरानो हो । आलस्य कहाँ छैन ? के हो त यसको कारण ? उत्तर आउँछ उही अशुद्ध भोजन । अशुद्ध भोजनले शरीरको पाचन संस्थान र स्नायु प्रणालीमा पार्ने दूषित प्रभावकै कारणले शरीरमा आलस्य तन्द्रा र जडता पैदा गर्दछ । अशुद्ध भोजनले विचारमा पनि प्रतिकूल प्रभाव पारिरहेको हुन्छ । फलस्वरुप काम, क्रोध, लोभ आदि उद्वेग, उत्तेजना र उन्मादको शिकार हुनु पर्दछ । मादक पदार्थ सेवन गरेर कलझगडा गर्ने प्रवृत्ति नेपाली समाजमा व्यापकरुपले फैलिएको मात्र हैन यो एउटा संस्कृति पनि बनेको छ र यो विकृतिलाई सामान्य र क्षम्यसमेत मानिएको छ । अझ यो विकृति त्यहाँ बढी गहिरो छ जहाँ बुद्ध धर्म मान्नेहरुकै बाहुल्यता रहेको छ । आज विद्यालयको पिकनिक, विवाहको भोजभतेर, जन नेताहरुको वैठक, सभासमारोह तथा सरकारी मिटिङ, समारोह आदि सबै अवसरमा मद्यपान, धूम्रपान र माँसाहार अनिवार्य आकर्षणको वस्तु ठहरिएको छ । घरमासमेत अतिथि सत्कारका लागि ऋण काढेरभए पनि मासुको परिकार पस्किनै पर्ने संस्कार यथावत रहेको छ । जुन मानिस यस्ता विकृतिहरुको वातावरणमा रमाएको छ र यसैलाई निरन्तरता दिने आसक्ति प्रकट गर्दछ त्यस्ता मानिसहरुको मनमा कुनै परिवर्तन, विकास र निर्माण गर्ने आँट एवं रचनात्मक साहस पनि हरउँदै जान्छ ।
शुद्ध भोजन सभ्य मानिसको पहिचान हो । शुद्ध भोजनले शुद्ध विचार र शुद्ध संस्कार भएका सन्तानको आगमनका लागि शुद्ध क्रोमोजोम्स निर्मित हुने संभावना प्रवल हुन्छ । त्यस्ता सन्तानका कुलमा मात्र सिद्धार्थ गौतमजस्ता महापुरुषको आविर्भाव हुन सक्दछ र त्यस्ता पुरुष नै भगवान बुद्ध बन्न सक्दछन् । यसको ज्वलन्त प्रमाण हो भगवान बुद्धका पिताजीको नाम । संसारलाई थाहा छ भगवान बुद्धका पिताजीको नाम शुद्धोदन हो । शुद्ध र ओदन यी दुई शब्दको समस्त शब्द नै शुद्धोदन हो । शुद्ध शब्दको अर्थ पवित्र हुन्छ भने ओदन शब्दको अर्थ भात वा अन्न हुनछ । राजा शुद्धोदनको आहार विहार अत्यन्त पवित्र थियो । राजा भएर पनि उँहाको जीवन सर्वसाधारणको जस्तै सरल र शुद्ध थियो । यो सत्य र तथ्यप्रति सवैको ध्यान जानु आवश्यक छ ।
अब अन्तमा धम्मपदबाट भगवान बुद्धका केही उपदेशहरु आजका अध्यापक, विद्यार्थी, युवा, व्यवसायी, नागरिकसमाज तथा राजनीतिक दल र राज्य संयन्त्रका वाहकहरुले आफ्नो जीवन र आचरणमा उतारुन् भन्नका लागि यहाँ प्रस्तुत छन् ।
१. प्रमादी नहोऊ, कामविषयमा आसक्त नहोऊ, प्रमादरहित भई ध्यान गर्यो भने विपुल सुख प्राप्त हुन्छ ।
२. सुमार्गमा लागेको चित्तले आफूलाई जति उपकार गर्दछ, त्यति उपकार बाबुआमा र कुटुम्बलेसमेत गर्न सक्दैनन् ।
३. अर्काको दोष र अर्काले के गर्यो, के गरेन भनी हेर्नु भन्दा आफ्नो दोष र आफूले के गरेँ के गरिन भनी हेर्नु नै बेस छ ।
४. भरसक आफूभन्दा गुणी मानिसको संगत गर्नू , नभए आफूसमानको सत्सगंत गर्नू , तर आफूभन्दा दुर्गुणीको संगत कहिल्यै नगर्नू ।
५. अरुलाई अनुशासनमा राख्न पहिले आफै अनुशासित बन्नुपर्दछ । आफूलाई दमन गर्नुपर्दछ । आत्म दमन गर्नु ज्यादै गार्हो कुरा हो ।
भगवान बुद्धका सम्बन्धमा जति धेरै चर्चा गरिएको छ , त्यसको एक प्रतिशत मात्र पनि व्यक्तिगत आचरणमा उतार्ने अभ्यास हुन्थ्यो भने आज संसारमा मैत्री, करुणा र न्यायपूर्णसमाजको स्थापना हुने थियो । बुद्धलाई मन पराउने तर बुद्धको शिक्षालाई आचरणमा नउतार्ने मानिसहरुको बाहुल्य भएको राज्य र समाजमा कसरी सुख, शान्ति र समृद्धिको परिकल्पना गर्न सकिएला ? फरि पनि आशा र विश्वास गर्नु पर्दछ । उज्यालो तिरै प्रस्थान गर्नु पर्दछ । भवतु सब्ब मंगलम् ।।
Related News
सम्बन्धित समाचार
जून ओर्लेको रात र त्यसको आलोक
नयाँ बिहानी: आदर्श समाजको २९ औं वर्ष
गण्डकी प्रदेश प्रशिक्षण प्रतिष्ठानका ४ वर्ष र आगामी कार्यदिशा
राणा कालमै हलो जोत्ने क्रान्तिकारी पं. मुक्तिनाथ
पाब्लो नेरुदा : जनकवि तथा क्रान्तिकारी नेता
hero news full width
मुख्य समाचार
चोटिलो बन्दै गण्डकीको संसदीय राजनीति
पुरानो पोखरा जोगाउन पहल: मेयर आचार्य
वैशाख ६, २०८१सुदुरपश्चिममा सोडारी मुख्यमन्त्री नियुक्त
वैशाख ६, २०८१प्रेमील गजलकारको भावपूर्ण बिदाइ
वैशाख ५, २०८१अधिवेशन आह्वानप्रति कांग्रेसको आपत्ति, द्वन्द्व निम्तिन सक्ने चेतावनी
वैशाख ५, २०८१गण्डकी प्रदेश सभाको अधिवेशन आह्वान
वैशाख ५, २०८१