मिति १९९५ साल फाल्गुण १५ गते मङ्गलबार पोखरा-६, बैदाम मुलथोकमा पिता शहदेव पहारी र माता हरिकला पहारीको कनिष्ठ सुपुत्रको रुपमा मध्यम वर्गीय किसान परिवारमा जन्म भएको थियो ।

सानै उमेरमा पिता शहदेव पहारीको दिवंगत भएकोले माता हरिकला पहारीको छत्रछायाँमा वहाँको लालनपालन भयो । सानै उमेरदेखि संस्कारित स्वभाव वहाँमा बिद्यमान रहेको थियो । तत्कालीन अवस्थामा शिक्षा दीक्षाको अभावका बाबजूद पनि वहाँले विद्वान गुर्रुवर्गको सानिध्यमा रही वेद, कर्मकाण्ड तथा ज्योतिष शास्त्रमा विशेष ज्ञान राख्नुभएको थियो ।

१९ बर्षको उमेरमा नेपाली संस्कृतिअनुसार भलामका कुष्माखर पौडेलकी माइली पुत्री पूर्णमाया पौैडेलसँग वैवाहिक सम्वन्ध जोडिन पुगेको थियो । उच्चशिक्षा हासिल गर्नका लागि भारत जानेक्रममा सातौ संम्वत्सर वहाँले भारतमा नै व्यतित गर्नुभएको थियो । भारतको राजनैतिक परिवेश  प्रजातान्त्रिक अभ्यासलाई आफ्नो भूमिमा पनि उतार्न तथा विदेशीभूमिमा पराधीन जीवन निर्वाह गर्नुभन्दा स्वदेशमा पसिना बगाउनु उपयुक्त ठानी पुनः नेपाल र्फकनुभयो ।

उद्योगिनां पुरुष सिहमुमैत्रि लक्ष्मी भन्ने संस्कार बोक्नुभएका स्व. भानुभक्त पहारीले व्यापार आफ्नो व्यवसायलाई एक दशकसम्म सञ्चालन गर्नुभयो । वहा निरन्तर भन्ने गर्नुहुन्थो कि परोपकाराय सतां विभुतय अर्थात् मानव जीवन परोपकारका लागि हो । धर्मको मर्यादामा रही  समाजको उत्थानका लागि वहाँले धेरै कार्य गर्नुभएको छ ।

लामो समयसम्म गति लिन नसकी जीण्ा अवस्थामा रहेको केदारेश्वर महादेवमणि लामाखोर बैदाम मन्दिरलाई हालको अवस्थासम्म ल्याइ पुर्‍याउने कार्यमा वहाँको महत्वपूर्ण भूमिका रहेको पाइन्छ ।

हालको मन्दिर परिसर र मन्दिरको क्षेत्रलाई सुरक्षित अवस्थामा राख्दै पोखराको धार्मिक पर्यटकीय विकास आवश्यक महसूस गरी तत्कालीन अवस्थामा स्थानीय व्यक्तिहरुको सहभागीतामा निर्माण गरिएको तदर्थसमितिको अध्यक्ष पदमा रही आर्थिक तथा भौतिक योगदान गर्नुभयो ।

पदीय दायित्वलाई भन्दा कार्यलाई विशेष महत्व दिने वहाँको स्वभावलाई वहाका मित्रहरुले प्रशंसा गर्ने गर्दछन् । प्रतिकूल स्वास्थका बाबजूद पछिल्लो समय केदारेश्वर महामणि महादेवमणि मन्दिरको उपाध्यक्ष पदमा रही लामो समय मन्दिरको व्यवस्थापनमा खटिनुभएको थियो भने पछिल्लो समय सल्लाहकार हुनुहुन्थ्यो । यज्ञ याज्ञिक कर्महरुमा उत्साह साथ समर्पित वहाँ दानी स्वभावको हुनुहुन्थ्यो ।

अदम्य साहसका धनी स्व. भानुभक्त पहारी लामो समयदेखि अस्वस्थ हुनुहुन्थ्यो । श्वासप्रश्वासको रोगबाट ग्रसित वहाँ उपचारको क्रममा मणिपाल अस्पताल पोखरामा २०७० साल श्रावण २८ गते ब्रम्हलीन हुनुभयो । यसरी एक सच्चा समाजसेवी व्यक्तित्व यो संसारबाट अनन्तकालका लागि बिदा भयो । अन्त्यमा वहाँको दिवंगत आत्माको चिरशान्तिको कामना गर्दछौ ।