पोखरा, २६ चैत । पोखरा महानगरपालिकाले स्थापना गरेको राहत कोषमा ३ करोड ६४ लाख रुपैयाँ जम्मा भएको छ । लकडाउनका कारण अति विपन्न र दैनिक ज्यालादारी गर्ने मजदुर लगायत जोखिममा परेका व्यक्तिलाई राहत उपलब्ध गराउन महानगरले कोषको स्थापना गरेको हो ।

विभिन्न संघ, संस्था, व्यक्तिहरुले अहिले सम्म महानगरले स्थापना गरेको राहत कोषमा १६ लाख ७१ हजार ६१ रुपैंयाँ सहयोग गरेका छन् भने गण्डकी प्रदेश सरकारले १ करोड दिएको छ, भने अन्य रकम महानगरपालिकाले नै जम्मा गरेको हो । राहतकोषमा सूर्य दर्शन बचत तथा ऋण सहकारीले ५१ हजार, १ सय ५१, कमल बचत तथा ऋण सहकारीबाट २५ हजार, हाम्रो सहयोगी बचत तथा ऋण सहकरीले २२ हजार २ सय २२, संयुक्त बचत तथा ऋण सहकारीले १५ हजार, रानीवन साकोसले १५ हजार १ सय १५, दपर्ण साकोस १५ हजार, बाघमारा बहुउद्देश्यीय (साकोस) सहकारीले ११ हजार १ सय ११, समय बचत तथा ऋण सहकारीले १० हजार रुपैयाँ सहयोग गरेको पोखरा महानगरपालिका सहकारी समितिका अध्यक्ष तेजनारायण अधिकारीले जानकारी दिए ।

यसैगरी सफल बचत तथा ऋण सहकारीले ११ हजार १ सय ११, स्वण श्री साकोस १० हजार, आँगन बहुउद्देश्यीय सहकारीले १० हजार १ सय, नयन बचत तथा ऋण सहकारीले १० हजार, शान्तिपथ गोरखा लाइन टोल अमरसिंहचोकका अध्यक्ष मेजर हितमान गुरुङ १० हजार, परेली साकोसले ५ हजार ५ सय सहयोग गरेका छन् । पोखरा–१४ नागमणि टोल निवासी नारायणप्रसाद सापकोटाले २२ हजार सहयोग गरेका छन् । महानगरले २ करोड, महानगरका कर्मचारीहरुबाट ४८ लाख ५० हजार जम्मा गरी राहत कोष स्थापना गरिएको हो भने उक्त कोषमा प्रदेश सरकारले १ करोड दिएको छ । कोषमा अहिलेसम्म ३ करोड ६४ लाख ७१ हजार ६१ रुपैयाँ जम्मा भएको छ ।