कोरोनाको जाँच अब पोखराबाटै

दक्ष प्राविधिकद्वारा पोखरामै कोरोना भाइरस नमूना परीक्षण गरिने

Avatar आदर्श समाज सम्वाददाता
चैत्र १८, २०७६

तस्वीर– दीपेन्द्र श्रेष्ठ, अध्यक्ष पत्रकार महासंघ कास्की

पोखरा, १९ चैत । विश्वब्यापी महामारीको रुपमा फैलिएको कोरोना भाइरसको जाँच अवदेखि पोखराबाटै हुने भएको छ । गण्डकी प्रदेशको पहलमा संघ सरकारले पोखराबाट परीक्षण गर्ने ब्यवस्था मिलाएको हो । चीनबाट आएको पोलिमर चेन रियाक्सन (पिसीआर) मेसिन पोखरा पठाइएको छ । अहिले मेसिन जडानको काम भैरहेको छ । मेसिनसँगै आवश्यक उपकरण र प्राविधिक टोली पनि खटाइएको छ ।

दुईजना प्राविधिकले ३ महिनासम्म कोरोना परीक्षण गर्नेछन् । मंगलबार विहान हेलिकोप्टर मार्फत सामग्री झारिएको हो । यसअघि कोरोना भाइरस नियन्त्रण सम्बन्धी उच्चस्तरीय समितिले चीनबाट आएका मेसिन ४ वटा प्रदेशमा पठाउने निर्णय गर्दा गण्डकी छनौट भएको थिएन । निरन्तर दवाव र समन्वयपछि काठमाण्डौंमा राखिएको स्टक मेसिन पोखरा पठाइएको हो । प्रदेशको जनसंख्या र जोखिमबारे संघ सरकारलाई जानकारी गराएपछि मात्रै मेसिन आएको गण्डकी प्रदेशका स्वास्थ्य निर्देशक डा. विनोदविन्दु शर्माले जानकारी दिए ।

अहिले ल्याइएको मेसिनबाट दैनिक १५ वटासम्म परीक्षण गर्न सकिन्छ । तर पोखरा स्वास्थ्य विज्ञान प्रतिष्ठानमा पनि यो भन्दा ठूलो क्षमताको अर्को प्रयोगविहिन मेसिन छ । प्राविधिक टोलीले त्यो मेसिन पनि प्रयोगमा ल्याउने तयारी गरेको छ । दुईवटा मेसिन भए जतिसुकै नमूना पनि पोखरामै परीक्षण गर्न सकिने बताईएको छ । मेसिन आएपछि प्रदेशभित्र सकारात्मक सन्देश प्रवाह भएको प्रदेशस्तरीय कोरोना नियन्त्रण समन्वय समितिका संयोजक तथा अर्थमन्त्री किरण गुरुङले बताए ।

हालसम्म गण्डकी प्रदेशमा ३२ वटा नमूना संकलन गरिएकोमा २० वटा नेगेटिभ र एउटा पोजिटिभ नतिजा आएको छ भने ११ वटाको नतिजा आउन बाँकी छ । परीक्षणको रिपोर्ट १ घण्टाभित्रैमा आउने छ । ५ वटा मेसिनमध्ये काठमाण्डौंमा राखिएको स्कट मेसिन पोखरा ल्याइएको प्राविधिक बलराम गौतमले जानकारी दिए ।गण्डकी सरकारले पोखरामा पश्चिमाञ्चल क्षेत्रीय अस्पताल र बागलुङमा धवलागिरि अञ्चल अस्पताललाई डेडिकेटेड अस्पतालको रुपमा अघि सारेको छ भने आवश्यक उपकरण जडानको काम पनि भैरहेको छ ।