टेनिस खेलाडी रोजर फेडररले कोरोना भाइरसबाट संकटग्रस्त आफ्नो देश स्विजरल्याण्डका मानिसहरूलाई सहयोग गर्न १० लाख भन्दा बढी सहयोग गरेका छन ।

टेनिसमा २० पटकको ग्रान्ड स्लाम च्याम्पियन फेडरर र उनकी श्रीमतीले यस संकटको समयमा १० लाख स्विस फ्र्यान्क लगभग १० लाख २० हजार डलर सहयोग गरेका हुन् ।

विश्व स्वास्थ्य संगठन (डब्ल्यूटीओ) को आधिकारिक तथ्यांक अनुसार स्विट्जरल्याण्ड विश्वमा कोरोना भाइरस संक्रमित देशहरुमध्ये नवौं स्थानमा छ। स्विस स्वास्थ्य मन्त्रालयका अनुसार कोभिड–१९ का कारण बुधबारसम्म स्विट्जरल्याण्डमा ८ हजार ८ सय मानिस संक्रमित भएका छन् । त्यहाँ सोमबारसम्म ८६ जनाको मृत्यु भएको छ ।

विश्व वरियतामा चार नम्बरमा रहेका ३८ वर्षीय रोजर फेडररले इन्स्टाग्राममा लेख्दै भनेका छन्, ‘यो सबैका लागि चुनौतीपूर्ण समय हो र कोही पनि पछि नपरुन, मिर्का र मैले स्विजरल्याण्डका अति असुरक्षित परिवारहरूलाई व्यक्तिगत रूपमा १ मिलियन स्विस फ्रान्क दान गर्ने निर्णय गरेका छौं ।’