विश्वब्यापी रुपमा फैलिएको कोरोना संक्रमणबाट बच्न सरकारले गरेको लकडाउनको बेला पोखरामा मोटरसाईकल चलाउनेको चावी ट्राफिक प्रहरीले खोेसेको छ । ब्यापार ब्यवसाय र सार्वजनिक तथा निजी सवारी साधन सहित सबैजसो क्षेत्र ठप्प रहेको घोषणा गरेपनि अटेर गरी सडकमा निकालिएका मोटरसाईकल र स्कुटरको चावी प्रहरीले खोसेको हो ।

दिनभरीमा ४ सय भन्दा बढी मोटरसाईकलको चावी खोसिएको ट्राफिक प्रहरी कार्यालय कास्कीका प्रमुख इन्स्पेक्टर सन्तोष रोकाले जानकारी दिए । ‘सरकारले सडकमा नझर्नु भनेको छ । एउटा मुठो साग लिएर आउँछन्, अनि अत्यावश्यक चिज हो भनेर उम्किन खोज्छन्,’ उनले भने, ‘जाँड खाएर डुलिरहेका पनि भेटियो ।’

बुधबारदेखि अझै कडाई गर्ने उनले बताए । ‘सुरुमा चावी मात्रै खोसेर मोटरसाईकल डोहोर्याउदै लैजान भन्यौं । अहिले चावी र कागजपत्र पनि खोसेका छौं,’ उनी भन्छन्, ‘भोलिदेखि अरु कानुनी कारबाही पर्ने गर्नुपर्ने देखियो । यसलाई अझै कडा गर्दैछौं ।’

सर्वसाधारणमा अझै सावधानीका लागि कुनै तयारी नहरेको र आफ्नै स्वास्थ्यप्रति गम्भीर नभएको रोकाको गुनासो छ ।