पोखरा। साहित्यकार हेमराज पहारीको १० औं स्मृति दिवस शनिबार पोखरामा मनाइएको छ । हेमराज पहारी स्मृति प्रतिष्ठानद्वारा आयोजित प्रतिनिधि कविहरुका कविता वाचन गरी स्मृति दिवस मनाइएको हो । पोखरेली साहित्यकारले पहारीलाई कविताबाटै सम्झिए ।

प्रमुख अतिथि साहित्यकार सरुभक्तले हेमराजका कृति बजारमा अप्राप्त भएकाले पुनः प्रकाशन गर्न आग्रह गरे । शुरुमा असल शिक्षकका रुपमा चिनेका पहारीलाई निकै पछिमात्र साहित्यकारका रुपमा चिन्न पाएको श्रेष्ठले बताए । सरुभक्तले भने, ‘उहाँका कृति पुनः प्रकाशन, बाँकी कृति प्रकाशनका लागि प्रतिष्ठानले पहल गर्नुपर्छ ।’साहित्यकार रमेश श्रेष्ठले आफूलाई पहारीले विद्यालय तहमा पढाएको सम्झिए ।

कार्यक्रममा सरस्वती श्रेष्ठ सरु, सरस्वती प्रतीक्षा, नुमराज बराल, अम्बिकाप्रसाद भट्टराई, रमा प्रासर, गौरी तमु, सुवास मल्ल र सुदर्शन पौडेलले कविता सुनाए । प्रतिष्ठान अध्यक्ष रीता न्यौपानेले पहारीका कृति प्रकाशन, पुरस्कार प्रदान, अन्तक्र्रिया लगायतका कार्यक्रम गरिरहेको जानकारी दिइन् । उनले पहारीको नियात्रा सञ्चयन उत्तरी गोलाद्र्धको एक फन्को चाँडै अंग्रेजीमा प्रकाशन गर्ने तयारी भएको उल्लेख गरिन् ।
प्रतिष्ठान उपाध्यक्ष गोविन्दराज पहारीले हेमराजलाई असल शिक्षक, सचेत नागरिक र प्रगतिशील सर्जकका रुपमा चिनाए । कार्यक्रम संचालन फणिन्द्र अकिञ्चनले गरेका थिए ।