झापा । मच्छिन्द्र फुटबल क्लब सताक्षी गोल्डकप फुटबलको फाइनलमा प्रवेश गरेको छ ।

झापाको झिलझिलेस्थित गणेशमानसिंह अध्ययन प्रतिष्ठान रंगशालामा शुक्रबार भएको तेस्रो संस्करणको सताक्षी गोल्ड कपको दोस्रो सेमिफाइनलमा त्रिभुवन आर्मी क्लबलाई २–० गोल अन्तरले पराजित गर्दै मच्छिन्द्रले उपाधिका लागि फाइनलमा स्थान बनाएको हो ।

मच्छिन्द्रको जितमा रेजिन सुब्बाले एक गोल गरे । आर्मीका विकास खवासले एक आत्मघाती गोल गरे । लिगको उपविजेता आर्मीविरुद्ध मच्छिन्द्रले दुवै हाफमा १/१ गोल गरेको थियो । खेलको २१ औं मिनेटमा रेजिनले गोल गर्दै मच्छिन्द्रलाई अग्रता दिलाए । त्यसपछि खेलको ७४ औं मिनेटमा विकासले आत्मघाती गोल गरेपछि मच्छिन्द्र फाइनल पुगेको हो ।

यससँगै सहिद स्मारक ‘ए’ डिभिजन लिग च्याम्पियन बनेको एक साता नबित्दै मच्छिन्द्रले अर्को प्रतियोगिताको फाइनलमा स्थान बनाउन सफल भएको छ । अब मच्छिन्द्रले उपाधिका लागि थ्रीस्टार क्लबसँग आइतबार फाइनल खेल्नेछ । आयोजक सतासीधाम स्पोर्टिङ क्लबलाई ३–१ गोल अन्तरले पराजित गर्दै थ्रीस्टारले फाइनलमा स्थान बनाइसकेको छ ।

सतासीधाम स्पोर्टिङ क्लबको आयोजनामा जारी प्रतियोगिताको विजेताले ६ लाख, उपविजेताले ३ लाख पाउनेछन् । प्रतियोगिताका ‘म्यान अफ दी टुर्नामेन्ट’ले ५० हजार र हाइस्कोररले २५ हजार पुरस्कार पाउनेछन् । त्यस्तै, उत्कृष्ट मिडफिल्डर, फरवार्ड, डिफेन्डर, गोलकिपर र उत्कृष्ट प्रशिक्षकले समान २०/२० हजार पुरस्कार पाउनेछन् ।