लेखनाथ ।पोखरा ३२ स्थित राधाकृष्ण वृद्धा आश्रममा रहेका ज्येष्ठ नागरिकलाई ७० औं प्रजातन्त्र दिवस अवसर पारी खाद्यान्न सामग्री वितरण गरिएको छ ।गण्डकी प्रदेश अर्थ तथा विकास समिति सभापति दीपक कोइराला र पोखरा महानगर प्रमुख मानबहादुर जिसीले संयुक्त रुपमा संस्थाका सभापति प्रेम लिगललाई सो सामग्री हस्तान्तरण गरेका हुन् । प्रमुख अतिथि सांसद कोइरालाले सेवा भनेकै शुद्ध एवं पवित्र सामाजिक कार्य भएको बताए । उनले ज्येष्ठ नागरिकलाई गरिएको सम्मानले आफ्नो र राज्यकोे दायित्व पूरा हुने बताए ।

पोखरा महानगरपालिका प्रमुख मानबहादुर जिसीले संघीय सरकारको निर्देशन अनुसार तीनदिने प्रजातन्त्र दिवस मनाउने योजना अनुसार आश्रमका ज्येष्ठ नागरिकलाई सेवाभावले सम्मान गरेको बताए ।
सो अवसरमा सांसद कोइराला र मेयर जिसीले स्थानीय पूर्वाधार विकास कार्यक्रमअन्तर्गत वृद्धाश्रममा ज्येष्ठ नागरिकका लागि बन्ने भवन शिलान्यास समेत गरे । दुईकोठे भवनको लागत १७ लाख ७० हजार हुनेछ ।
पोखरा ३२ का वडाध्यक्ष अक्कलबहादुर कार्कीको अध्यक्षतामा भएको कार्यक्रममा स्वागत मन्तव्य संस्थाका उपाध्यक्ष विश्वराज लामिछाने, संचालन महासचिव शोभामोहन पौडेल र धन्यवाद ज्ञापन अध्यक्ष प्रेम लिगलले गरेका थिए ।