एनआरटीको ए डिभिजन लिगमा तेस्रो जित

Avatar आदर्श समाज सम्वाददाता
माघ १, २०७६

काठमाण्डौं । सहिद स्मारक ए डिभिजन लिग फुटबलमा न्यूरोड टिम एनआरटीले तेस्रो जित निकालेको छ ।

विभागीय नेपाल पुलिस क्लबमाथि १–० गोल अन्तरले हराउँदै सोमबार न्यूरोड टिमले तेस्रो जित निकालेको हो ।

यस जितसँगै एनआरटी लिगको छैटौं स्थानमा उक्लिएको छ । एनआरटीले ६ खेलबाट ८ अंक जोड्दै जारी लिगको छैटौं स्थानमा उक्लेको हो ।

त्रिपुरेश्वरस्थित दशरथ रंगशालामा एनआरटीको जितमा दर्शन गुरुङको एकमात्र गोल निर्णायक बन्यो । पहिलो हाफ गोलरहित बराबरीमा सकिएको खेलको ७६ औं मिनेटमा दर्शनले गोल गर्दै टिमलाई अग्रता दिलाएका थिए । उनले डिबक्स भित्रबाट प्रहार गरेको बलले जाली चुम्न पुगेको थियो ।

खेलको ३७ औं मिनेटमा पुलिसका सुमन लामाले डिबक्स भित्रबाट प्रहार एनआरटीका गोलरक्षक अजित प्रजापतिले बचाए । ४८ औं मिनेटमा पुलिसका मानबहादुर परियारको हेड बल एनआरटीका मिडफिल्डर एरिक बिष्टले गोललाइनबाट क्लियर गरिदिए ।

यस्तै, खेलको अतिरिक्त समयमा पुलिसका अन्जन राईले डिबक्स बाहिरबाट गरेको लामो प्रहार क्रसबारमा लागेर फर्किदा पुलिस बराबरी गर्नबाट चुक्यो । खेलको ७८ औं मिनेटमा राजेश परियारले डिबक्स भित्रबाट हानेको कडा प्रहार पुलिस गोलरक्षक शत्रुधन चौधरीले बचाउ गरे । पुलिसको यो दोस्रो हार हो । पुलिस ६ खेलबाट ८ अंकसहित जारी लिगको सातौं स्थानमा झरेको छ ।

एपीएफ–च्यासलको बराबरी

 

त्यस्तै, जारी लिग फुटबलमा च्यासल युथ क्लब र विभागीय एपीएफ क्लबले सोमबार बराबरी खेलेको छ ।

त्रिपुरेश्वरस्थित दशरथ रंगशालामा भएको खेलमा च्यासलले एपीएफसँग गोलरहित बराबरी खेलेको हो ।

एपीएफलाई बल पोजिसनमा दवावमा राखेको च्यासलले पाएको अवसर सदुपयोग गर्न नसक्दा १ अंकमा चित्त बुझायो । एपीएफले समेत केही गोलको अवसर खेर फाल्यो । खेलको १६ औं मिनेटमा नबिन लामाको कर्नरमा आएको बलमा एपीएफका राजन गुरुङको उत्कृष्ट हेड च्यासलका गोलरक्षक एलेन न्यौपानेले पञ्च गर्दै गोल हुनबाट बचाउ गरे ।

खेलको २० औं मिनेटमा च्यासलले गोलको अर्को सुनौलो अवसर गुमायो । सुनिल खड्काले एक डिफेन्डरलाई बिट गरेपनि वान भर्सेस वानको स्थितिमा गोल गर्नबाट चुके । डिबक्स भित्रबाट हानेको सुनिलको प्रहार एपीएफका गोलरक्षक अमृतकुमार चौधरीले बचाउ गरे ।

खेलको २५ औं मिनेटमा च्यासलका अमिर श्रेष्ठले डिबक्स भित्रबाट हानेको सशक्त प्रहार एपीएफका गोलरक्षक अमृतले पञ्च गर्दै आउट फालिदिए । खेलको ३८ औं मिनेटमा एपीएफका रबि थिङको प्रहार च्यासलका गोलरक्षक एलेनले बचाउ गरे ।

यस्तै ५४ मिनेटमा युवराज खड्काको क्रसमा राजीब लोप्चनको हेड पनि एलेनले पन्च गर्दै गोल हुनबाट जोगाए । एपीएफसँगको बराबरीसँगै च्यासलले अंक तालिकामा सुधारको अवसर गुमाएको छ । ६ खेलबाट ६ अंक जोडेको च्यासल लिगको दशौँ स्थानमा छ । यस्तै, एपीएफ ६ खेलबाट ५ अंक बटुल्दै जारी लिगको ११ औं स्थानमा छ ।

हाम्रो सुझाव