पोखरा । नेपाली चलचित्र ‘पर्खी बसेँ’को नयाँ सिरिज बन्नने भएको छ ।

गोपीकृष्ण मुभिजले हिमालयन मुभी स्टुडियोसँगको सहकार्यमा फिल्म ‘पर्खी बसेँ–२’ निर्माण गर्न लागेको हो ।

गोपीकृष्ण मुभिजको निकिता पौडेल र हिमालयनमुभी स्टुडियोको विनोद सापकोटाले फिल्म निर्माणका लागि विहीबार सम्झौता गरेका छन् । चलचित्रमा निकिता र विनोद निर्माता रहने छन् भने प्रदीप दाहाल र तिर्थप्रसाद पौडेल सह–निर्माताको रुपमा रहनेछन् ।

२०६४ को चैत्र अन्तिममा प्रदर्शनमा आएको चलचित्र ‘पर्खी बसेँ’लाई दीपक श्रेष्ठले निर्देशन गरेका थिए । यस दोस्रो सिरिजको निर्देशन भने चलचित्र ‘लभ डायरिज’का निर्देशक सौभर चौधरीले गर्नेछन् । पहिलो सिरिज झैँ दोस्रोमा पनि सांगीतिक प्रेम कथा देखाइने निर्देशक सौरभले बताए ।

करण श्रेष्ठ र रिच इन्टरटेनमेन्टले नेपालभरि चलचित्र वितरणको जिम्मा लिएको छ । चलचित्रको पहिलो सिरिजमा राजबल्लभ कोइराला, युना उप्रेती, निखिल उप्रेतीलगायतको अभिनय थियो ।