हाईकर्स समूहलाई कालाबाङ घरेडी होमस्टेमा स्वागत

Avatar आदर्श समाज सम्वाददाता
पौष २९, २०७६

पोखरा, २९ पुस । स्वास्थ्य र पर्यटन विकासको लागि हाईकिङ भन्ने मुल नाराका साथ हरेक महिनाको अन्तिम शनिबार हुँदै आएको हाईकर्स भाग १० मा सहभागीहरुलाई पोखरा २२ मा रहेको कालाबाङ घरेडी सामुदायिक होमस्टेमा स्वागत गरिएको छ ।

पोखरा महानगरपालिका वडा नं. १७ को छोरेपाटनबाट सुरु गरिएको हाईकिङको पोखरा १७ का वडा अध्यक्ष तीर्थराज अधिकारीले शुभकामना दिदैं हाइकिङ संगै नेपाली ग्रामिण परिवेश, साँस्कृतिक, भौगोलिक, जनजीवीकाको अध्ययन गर्न सुझाव दिएका थिए ।विहान ९ वजे छोरेपाटनबाट सुरु भएको हाईकिङ कोदीडाँडा, शान्ति स्तुपा, महादेव मूर्ति निर्माण स्थल पुम्दीकोट टावर हुँदैं कालाबाङ घरेडी होम स्टे पुगेको थियो ।

पोखरा वजारबाट वरपर रहेका सामुदायिक होमस्टेहरुलाई पदमार्गबाट पनि जोड्न सकिने सम्भाव्यता अध्ययन तथा पदयात्रा गर्न रुचाउनेहरुको लागि पदयात्रा गर्दै होमस्टेमा पुग्न पदमार्गको पहिचान हुने हाइकर्स क्लबका अध्यक्ष प्रवीण तुलाचनले वताए ।विगत चैत्र महिनादेखि सुरु भईरहेको हाईकिङको संयोजन पत्रकार कृष्ण रानाभाट र ट्रेकिङ गाईड सुन्दरमणि त्रिपाठीले गर्दै आएका छन् ।