मानव मिलन संस्था लेखनाथले कविशिरोमणि लेखनाथ आधारभूत विद्यालय पोखरा–२७, अर्चलेमा छात्रछात्राहरुलाई खाजा तथा शैक्षिक सामग्री प्रदान गरेको छ।

विद्यालयमा शुक्रबार एक कार्यक्रम आयोजना गरी उक्त सामग्री हस्तान्तरण गरिएको हो।

त्यस अवसरमा प्रमुख अतिथि संस्थाका सल्लाहकार तथा युवा नेता गुरु बरालले विपन्न वर्गका बालबालिका पढ्ने अधिकांश सरकारी विद्यालयहरुको दूरावस्था रहेको उल्लेख गर्दै सबैले सहयोग गर्नुपर्ने बताए।

उनले मानव मिलन लेखनाथ भर्खरै बामे सर्दै गरेको संस्था भए पनि प्रारम्भमै छात्रछात्रालाई राहत दिने कार्यमा अग्रसर भएकोमा सो कार्यको प्रशंसा गरे।

स्वतन्त्र पत्रकार संघ नेपालका संस्थापक अध्यक्ष कृष्णप्रसाद बास्तोलाले विभिन्न संघसंस्थाबाट उपलब्ध राहतले विद्यालयमा विद्यार्थी संख्या वृद्धिमा सहयोग पुग्ने बताए।

मानव मिलन अन्तराष्ट्रिय महिला समितिकी सचिव सावित्री शर्माले संस्थाको मूलनारा नै स्वास्थ्य, शिक्षा, सेवा रहेको उल्लेख गर्दै उद्देश्य अनुरुप विभिन्न कार्यक्रम सञ्चालन गदैर्आएको बताइन्।

मानव मिलन पोखराका अध्यक्ष रेशमराज सुवेदीले कविशिरोमणिको पवित्र जन्मस्थलमा रहेको उक्त विद्यालयलाई व्यवस्थित र उत्कृष्ट बनाउनुपर्नेमा जोड दिए।

कार्यक्रममा उपाध्यक्ष गुप्तप्रसाद शर्मा, विद्यालयका पूर्व प्रअ सूर्यबहादुर वाग्ले, नेपाली काँग्रेस कास्कीका सदस्य नम्रता बराल, संस्थाका सदस्य विश्वराज पौडेलले शुभकामना व्यक्त गरेका थिए।

पोखरा–२७ का वडा सदस्य समेत रहेका मानव मिलन संस्था लेखनाथका अध्यक्ष प्रेमप्रसाद बरालको अध्यक्षतामा भएको सो कार्यक्रममा शिक्षिका लक्ष्मी लामिछाने, संस्थाको तर्फबाट कोषाध्यक्ष माया बराल, छात्र दिनेश अधिकारीले स्वागत मन्तव्य राखेका थिए।

कार्यक्रमको सञ्चालन विद्यालय प्रअ तथा संस्थाका सचिव गुरुप्रसाद सापकोटाले गरेका थिए। यसैगरी, छात्राहरुले नृत्य प्रस्तुत गरेका थिए।