विश्वहिन्दू महासंघ नेपाल जिल्ला कार्यसमिति कास्कीले पोखरामा नेपाली समाजमा सनातन धर्म र हिन्दू संस्कृतिको महत्व विषयक क्षेत्रगत रुपमा दोस्रो चरणको मावि स्तरीय वक्तृत्वकला प्रतियोगिता सम्पन्न गरेको छ।

धार्मिक, सामाजिक र नैतिक समाजको उत्थान हाम्रो अभियान भन्ने नाराका साथ आयोजित कार्यक्रमको उद्घाटन गर्दै विश्वहिन्दू महासंघका केन्द्रीय उपाध्यक्ष शंकर खरालले हिन्दू धर्म संस्कार र संस्कृति विश्वकै उत्कृष्ट भएको हुँदा यसको संरक्षणका लागि सम्पूर्ण व्यक्ति लाग्नुपनेर्मा जोड दिए।

अब पनि पूर्वीय संस्कृतिको संरक्षणमा लागेनौ भने पश्चिमा संस्कृतिको आक्रमण बढ्दै जाने र हाम्रो संस्कृति हराउने बताए।

कार्यक्रममा संस्कृत माविका सहप्राध्यापक श्रीकृष्ण सिग्देल, सिद्धार्थ आमा समूहका अध्यक्ष संगीता पौडेल, साहित्यकार छन्दिका त्रिपाठीलगायतले भनाइ राखेका थिए।

विश्वहिन्दू महासंघ नेपाल कास्कीका अध्यक्ष पार्वता पौडेलको अध्यक्षतामा भएको कार्यक्रममा स्वागत कार्यक्रम संयोजक गीता आचार्य सञ्चालन विश्वहिन्दू महासंघ कास्कीका महासचिव शिवप्रसाद कोइरालाले गरेका थिए। कार्यक्रममा साहित्यकार रामनाथ अधिकारीले कविता वाचन गरेका थिए।

विभिन्न विद्यालयका २८ विद्यार्थीले सहभागिता जनाएको प्रतियोगिता निर्णायकमा पृथ्वीनारायण क्याम्पसका उपप्रध्यापक सुरज पौडेल र रेडियो सफलताका प्रबन्ध निदेर्शक दुर्गा अधिकारी रहेका थिए।

वक्तृत्वकला प्रतियोगितामा पोखरा माविकी कृतिका त्रिपाठी, प्रगती माविकी मन्जुश्री सापकोटा, ज्ञानसरोवर माविकी सरिश्मा बास्तोला क्रमशः प्रथम, द्वितीय र तृतीय भएका छन्। त्यस्तै सान्त्वनामा संस्कृत माविका सौरव पौडेल, वालमन्दिर माविका अपेक्षा शर्मा, र करुणानिधि माविका जागृति अधिकारी भएका छन्।

प्रथम, द्वितीय, तृतीय र सान्त्वनाले क्रमशः नगद १ हजार, ७ सय, पाँच सय र तीन सयसहित सम्मानपत्र प्राप्त गर्नुका साथै श्रीपञ्चमीको दिनमा हुने फाइनल प्रतियोगिताका लागि छनौट भएका छन् । संस्थाको आयोजनामा पौष ११ गते जनप्रिय मावि सिमलचौरमा प्रतियोगिता गरी त्यहाँबाट छानिएका सहितको अन्तिम प्रतिस्पर्धा माघ १६ गते श्रीपञ्चमीको दिन केदारेश्वर महादेवमणि सेवा आश्रममा गरिने बताइएको छ। कार्यक्रममा उपस्थित सम्पूर्णलाई एक/एकप्रति श्रीमद् भागवत् गीताको पुस्तक निःशुल्क प्रदान गरेको थियो।