नेपालमा साहसिक पर्यटनलाई बढावा दिन मंगलबारबाट ६ दिने स्काइडाइभिङ पोखरामा शुरु भएको छ। पोखरा स्काइडाइभिङ नाम दिएर आयोजना गरिएको कार्यक्रममा नेपाल र भारतका १ सय ६० जना क्लाइन्टले सहभागिता जनाउने आयोजक एक्सप्लोर हिमालयका जनरल म्यानेजर अनुज पाण्डेले जानकारी दिए।

‘फ्लाई हाई, टच द स्काई’ नाराका साथ फेवा तालको सिरानमा अवस्थित खालि जमिनको आकाशमा यो कार्यक्रम भइरहेको छ।

अधिकांश सहभागी नेपाल र भारतका रहेका छन्। विदेशीका लागि १ हजार अमेरिकी डलर र नेपालीका लागि ९ सय अमेरिकी डलर सहभागीता शुल्क तोकिएको पाण्डेले सुनाए।

हेलिकोप्टरबाट हाम फालेर झर्दै प्यारासुटबाट ओर्लिने खेल स्काइडाइभिङ हो। हिमाल आरोहणपछिको सबैभन्दा महँगो र साहसिक मानिने स्काइडाइभिङ पोखराको पामे क्षेत्रमा रहेको एभिया क्लबको हवाई खेलकुद अभ्यास मैदानमा भएको हो। कार्यक्रममा १३ जना विदेशी विज्ञले उडान र जम्प गराइरहेको जनाइएको छ।

स्काइडाइभिङको प्राविधिक जनशक्तिको नेतृत्व फ्रान्सका पाउल हेनरीले गरेका छन् भने फ्रान्ससहित बेलायत, पोल्यान्ड, अमेरिका, पानामा, साउदी अरेबिया लगायतका देशका जनशक्तिहरु स्काइडाइभिङमा उपस्थित भएका भएको पाण्डेले सुनाए। सन् २००८ बाट परीक्षण र २०१३ बाट वार्षिक रुपमा स्काइडाइभिङका कार्यक्रम नेपालमा भए पनि जनशक्तिको अभाव अझैसम्म देखिएको बताउने गरिएको छ।

पोखरा र स्याङबोचेमा स्काइडाइभ हुँदै आएको छ। स्काइडाइभिङमा आवश्यक हेलिकोप्टरका जनशक्ति बाहेक हाम फाल्न र ल्यान्डिङ गराउने प्राविधिक स्काइडाइभिङ मास्टर नेपाली नभएको बताइएको छ।