पोखरा, २७ कात्तिक । साझा पार्टीले डा. गोविन्द केसीका माग सम्बोधन गर्न माग गरेको छ ।

पोखराको मानव अधिकार चोकमा मङ्गलबार कोण सभाको आयोजना गरि साझाले डा. गोविन्द केसीका मागहरू पुरा गरि उनको जीवन रक्षाका लागि पहल गर्न माग गर्दै प्रदर्शन गरेको हो। यद्यपि सीमा मिचिएको प्रतिकुल अवस्थाका लागि भन्दै डा. केसीले मङ्गलबार अपरान्हबाटै आफ्नो अनशन स्थगित गरिसकेका छन् ।

कोण सभालाई सम्बोधन गर्दै पार्टीकी केन्द्रीय सदस्य तथा आसन्न उपनिर्वाचनमा कास्की क्षेत्र नं २ की उम्मेदवार रजनी केसीले शिक्षा, स्वास्थ्य र सार्वजनिक यातायातलाई पूर्ण रुपमा राज्यको नियन्त्रणमा नराखिएसम्म डा. केसी जस्ता सत्याग्रहीले पटकपटक अनशन बस्नुपर्ने दुखद अवस्था आइरहने बताइन। आफ्नो पार्टीको मुख्य नारा नै स्वास्थ्य, शिक्षा र सार्वजनिक यातायात राज्यको दायित्व भित्र राखिनुपर्ने भन्दै जनताको स्वास्थ्य माथि खेलवाड गर्नेहरूलाई निर्वाचनबाटै परास्त गर्नुपर्ने धारणा राखिन।

कोण सभालाई साझा पार्टी कास्कीका संयोजक अर्जुन खनालले पनि सम्बोधन गरेका थिए। आफूसँग विगतमा भएका सम्झौता कार्यान्वयन हुनुपर्ने लगायतका माग राख्दै केसीले डडेलधुरामा १७औं अनशन शुरु गरेका थिए।