म्याग्दी ,२५ कात्तिक ।म्याग्दीको अन्नपुर्ण गाउँपालिकाका अध्यक्ष क्याप्टेन डमबहादुर गर्बुजा पुनले शैक्षिक विकास गाउँपालिकाको पहिलो प्राथमिकता भएको बताएका छन् । आइतबार गाउँपालिका –२ भुरुङ्ग तातोपानीमा रहेको सर्वोदय माविद्धारा आयोजित बस संचालनार्थ देउसी भैलोको आयव्यय सार्वजनिक तथा सम्मान कार्यक्रमलाई सम्बोधन गर्दै अध्यक्ष क्याप्टेन गर्बुजा पुनले यस्तो बताएका हुन् ।

देउसी भैलोले नेपालीहरुको मौलिक संस्कृतिको संरक्षण संगै शैक्षिक विकासमा सहयोग पुग्ने बताए । शिक्षाले मात्र समाज परिवर्तन सम्भव भएको बताउँदै अध्यक्ष क्याप्टेन पुनले गाउँपालिकाले शिक्षालाई पहिलो प्राथमिकता दिएर नीति ,योजना निर्माणसंगै बजेट विनियोजन गरेको जानकारी दिए । सामुदायिक विद्यालयमा बस संचालनका लागि गाउँपालिकाले बजेट विनियोजन संगै आवश्यक पहल गर्ने बताए ।

नेपाल सरकारको विद्यालय भर्ना अभियानमा सबैले सहयोग गर्नुपर्नेमा जोड दिए । विद्यालय बाहिर रहेका बालिबालिकालाई विद्यालय आउने वातावरण सिर्जना गर्न गाउँपालिकाले विभिन्न कार्यक्रम संचालन गरेको बताए । नेपाल सरकारबाट पाउने सेवा सुविधा समेत गाउँपालिका भित्र रहेका गरिब विपन्न तथा जेहेन्दार विधार्थीको पढाईमा सहयोग गर्दै आएका अध्यक्ष क्याप्टेन गर्बुजा पुनले शिक्षामा लगानी बढाउनुपर्नेमा जोड दिन्छन् ।

उनले गाउँपालिकाले शैक्षिक क्षेत्रमा गुणस्तर बृद्धि गर्न निजी स्रोतका शिक्षक व्यवस्थापनका लागि आवश्यक बजेट विनियोजनको तयारीमा रहेको सुनाए । गाउँपालिकाले शैक्षिक क्षेत्रमा सबैभन्दा बढी बजेट विनियोजन गरेको सुनाए । गाउँपालिका भित्र रहेका विद्यालयमा दरबन्दी मिलान ,भौतिक पुर्वाधार निर्माण लगायत निजी स्रोतका शिक्षक व्यवस्थापनका लागि सबैसंग छलफल गरी आवश्यकताका आधारमा बजेट विनियोजन गर्ने उद्धघोष गरे ।

‘शैक्षिक क्षेत्रको विकासलाई गाउँपालिकाले पहिलो प्राथमिकता दिएको छ,’अध्यक्ष क्याप्टेन पुनले भने । ‘गाउँपालिका भित्र रहेका सामुदायिक विद्यालयको गुणस्तर बृद्धि ,दरबन्दी मिलान,भौतिक पुर्वाधार निर्माण संगै निजी स्रोतका शिक्षक व्यवस्थापनका लागि आवश्यक नीति ,योजना निर्माण तथा बजेट विनियोजन गरिएको छ ।’

देउसी भैलोबाट संकलित रकमलाई सही सदुपयोग गर्न उनले सबैलाई आग्रह गरे । शैक्षिक क्षेत्रलाई गुणस्तरीय बनाउन सरकारको मात्र एकल लगानी नभई शिक्षक ,विद्यार्थी तथा समुदायको उत्तिकै महत्वपुर्ण भूमिका रहेको उल्लेख गरे । साथै उनले गाउँपालिका भित्र संचालित विभिन्न विकास निर्माणका योजनाहरुलाई समयमै सम्पन्न गर्ने गरी अगाडि बढाएको बताए ।

विद्यालयले सञ्चालन गरेको स्कुल बस सञ्चालनार्थ आयोजित देउसी भैलोबाट ५ लाख पाँच हजार ७ सय ४० रुपैयाँ संकलन भएको विद्यालयका प्रअ किसनबहादुर पुनले जानकारी दिए । उनका अनुसार देउसी भैलो सञ्चालनमा साढे एक लाख रुपैयाँ बढी खर्च भएको थियो ।

कार्यक्रममा वडा अध्यक्ष ओमप्रसाद फगामीले देउसी भैलो संचालनबाट संकलन भएको रकम सही सदुपयोग गर्न आग्रह गरे । विद्यालय व्यवस्थापन समितिका अध्यक्ष बुद्धि पुनको अध्यक्षता तथा शिक्षक नवीन पुनको संचालन तथा मुरारी पौडेलको स्वागतमा कार्यक्रम सम्पन्न भएको थियो । यसैगरी सोही कार्यक्रमको अवसरमा किम्ला खर्क सामुदायिक वनउपोभोक्ता समेतिबाट ५५ हजार ५ सय ५५ रुपैयाँ , मितेरी आमा समुह ठुलो बगरबाट २० हजार रुपैयाँ तथा शिक्षक शिक्षीका अन्य समाजसेवीहरुको तर्फबाट गरी १लाख ८० हजार रुपैयाँ संकलन भएको देउसी भैलो संयोजक श्याम रानाले जानकारी दिए ।

क्लब ,आमा समुह तथा विभिन्न संघसंस्थामा आवद्ध प्रतिनिधिहरुको उपस्थिति रहेको थियो । साथै सोही कार्यक्रमको अवसरमा कोरियन टेलिकमाले प्रदान गरको फस स्टेपको ब्याग जनप्रतिनिधि,विद्यालय व्यवस्थापन समितिका पदाधिकारी लगायत सामाजिक व्यत्तित्वहरुलाई वितरण गरिएका विद्यालयका प्रअ पुनले जानकारी दिए ।