स्थापनाको २२ वर्षपछि लेखनाथ जेसीजले आफ्नै सचिवालय भवनबाट जेसीज सप्ताह २०१९ शुरुवात गर्ने भएको छ।

‘मानवताको सेवा नै जीवनको सवोर्त्तम कार्य हो’ नाराका साथ शनिवार सचिवालय भवनमा पत्रकार सम्मेलन गरी जुनियर जेसीजको सहकार्यमा कात्तिक २४ देखि ३० गतेसम्म सो कार्यक्रम गरिने जनाएको हो। जेसीज सप्ताहअन्तर्गत पहिलो दिन सचिवालय उद्घाटन गरिने कार्यक्रमका मूल संयोजक सुजन न्यौपानेले जानकारी दिए।

कात्तिक १५ मा पोखरा ३३ भरतपोखरीस्थित सरस्वती टीका माविका अति गरीब तथा जेहेन्दार विद्यार्थीलाई न्यानो कपडा वितरण, २६ गते पोखरा २७, तालचोकमा विद्यालयस्तरीय वक्तृत्वकला प्रतियोगिता, २७ गते तालचोकदेखि बेगनासतालसम्म स्वास्थ्यका लागि दौड प्रतियोगिता, २८ गते पोखरा २६, कालिकाचोकमा खुला रक्तदान कार्यक्रम गरिने छ।

कात्तिक २९ मा पोखरा २९ भण्डारढीकस्थित जनप्रकाश माविमा अभिभावकत्व तालिम र अन्तिम सातौं ३० गते लेखनाथ उद्योग वाणिज्य संघमा असल नेतृत्व र उत्प्रेरणा तालिम सहित सम्मान तथा पुरस्कार वितरण गरिनेछ।

लेखनाथ जेसीजका अध्यक्ष रोशन अधिकारीको अध्यक्षतामा भएको कार्यक्रममा मूल संयोजक सुजन न्यौपानेले स्वागत, निवर्तमान अध्यक्ष शालिकराम ओझाले धन्यवाद र महासचिव चिरञ्जीवी न्यौपानेले सञ्चालन गरेका थिए।