पोखरा,२० कात्तिक । मंसिर १४ गते हुने उपनिर्वाचनमा कास्की निर्वाचन क्षेत्र नं २ मा नेपाली काँग्रेसले पुराना नेता खेमराज पौडेललाई उम्मेदवार बनाउने निर्णय गरेको छ ।

नेपाली काँग्रेस केन्द्रीय समितिको बुधवार सम्पन्न बैठकले पौडेललाई कास्की निर्वाचन क्षेत्र नं २ बाट उम्मेदवार बनाउने निर्णय गरेको छ । औपचारिक रुपमा साँझ पाँच बजे उम्मेदवार घोषणा गरिने बताइएको छ । उनी  पुम्दीभुम्दी निवासी हुन् ।

तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीको हेलिकोप्टर दुर्घटनामा निधन भएपछि रिक्त प्रतिनिधिसभा सदस्य पदका लागि निर्वाचन हुन लागेको हो । उम्मेदवार घोषणासँगै अब कास्कीमा निर्वाचनको चहल पहल वढेको छ ।

कास्कीकै उपनिर्वाचनमा सत्तारुढ दल नेपाल कम्युनिष्ट पार्टी (नेकपा) ले रवीन्द्र अधिकारीकी धर्मपत्नी विद्या भट्टराईलाई उम्मेदवारका रुपमा प्रस्तुत गरेको छ । त्यस्तै साझा पार्टीले रजनी केसीलाई उम्मेदवार बनाएको छ भने राष्ट्रिय प्रजातन्त्र पार्टीले रोमबहादुर भण्डारी, समाजवादी पार्टीले ई धर्मराज गुरुङ, विवेकशीलले जमुना शर्मालाई उम्मेदवार बनाएको छ । त्यसैगरी अन्य दलले पनि आफ्ना उम्मेदबार चयन भएका छन् ।

पोखरा महानगरअन्तर्गत ११ वडा यस निर्वाचन क्षेत्रमा पर्ने भएकाले प्रत्येक वडामा दुई/दुईका दरले मतदाता स्वयंसेविका परिचालन गरिने बताइएको छ । मतदाता स्वयंसेवी छनोट प्रक्रिया बढिसकेको र उनीहरूलाई आवश्यक तालिम दिएर मङ्सिरको पहिलो साता सम्बन्धित वडामा पठाइसकिने निर्वाचन कार्यालयले जनाएको छ ।कास्की क्षेत्र नं २ मा हुने उपनिर्वाचनमा कूल मतदाता ७१ हजार ८७१ छन् ।