पोखरा, ८ कात्तिक । नेपाली कांग्रेसका केन्द्रीय सदस्य गोपालमान श्रेष्ठले सुशासनको प्रतिवद्धता जनाउने प्रधानमन्त्री केपी शर्मा ओलीले सुशासन कायम गर्न नसकेको बताएका छन् ।

नेपाली कांग्रेस जिल्ला कार्य समिति स्याङ्जाद्धारा शुक्रवार स्याङ्जामा आयोजित चियापान तथा शुभकामना कार्यक्रममा वोल्दै उनले ठूल्ठूला भ्रष्टाचार जन्य कसुरमा आरोपित ठूला माछाहरुलाई छाड्ने गरेको आरोप लगाए ।

बालुवाटार जग्गा प्रकरण, ३३ क्विन्टल सुन, वाइडवडी प्रकरण र हत्या, हिंसा, बलात्कार लगायतका जघन्य घटनाका आरोपीलाई कानूनी कारवाही गर्न सरकारले नै चासो राख्दैन ।’ उनले भने– वर्तमान सरकारले कुनै राम्रा काम गरेको छैन् ।

कार्यक्रममा संघीयसभा सदस्य नारायणप्रसाद मरासिनी, प्रदेशसभा सदस्यहरु दीपक थापा चर्तीमगर, पूर्व सांसद शंकरप्रसाद पाण्डे, जिल्ला समन्वय समिति प्रमुख सीता सुन्दास, पुतलीबजार नगरप्रमुख सीमा क्षेत्री, भीरकोट नगरप्रमुख छायाराम खनाल, उपप्रमुख महेश पुरी, आँधीखोला गाउँपालिकाका उपाध्यक्ष शर्मिला पौडेल, नेकपाका उदय श्रेष्ठ, राप्रपा सचिव बिश्वन्धु पौडेल, राप्रपा संयुक्तका नेता रामबन्धु रेग्मी, नयाँ शक्ति नेपालका ख्यामनारायण ढकाल, राष्ट्रिय जनमोर्चा नेपालका अध्यक्ष राजेन्द्र गैह्रै, वामपन्थी नेता शोभाखर ढकाल, महिला नेतृ सरस्वती तिवारी, एनआरएनए का केन्द्रीय सदस्य जेदु पोखरेल लगायतले चाडपर्वले एक आपसको तित्तता र रिक्ततालाई मेटाउदै सहकार्य र एकता गर्दै विकास निर्माणमा अघि बढ्नु पर्नेमा जोड दिए । नेपाली कांग्रेस कार्यवाहक सभापति बुद्धिबहादुर राना (कुमार) को अध्यक्षतामा सम्पन्न कार्यक्रमको संचालन प्रवक्ता इन्द्रबहादुर गोदारले गरेका थिए ।