पाेखरा, २७ असाेज  गण्डकी प्रदेशका सांसद एवं अर्थ तथा विकास समितिका सभापति दीपक कोइरालाले मुख्यमन्त्री वातावरणमैत्री नमूना कृषि फार्मको निरीक्षण गरेका छन् ।

कास्कीको रुपा गाउँपालिका–३ पोल्याङको नमूना कृषि गाउँको अबलोकन गरेका हुन् । गण्डकी प्रदेशका ३६ गाउँलाई नमूना कृषि गाउँको रुपमा विकास गर्ने गरी २०७५ चैत १० गते गण्डकी प्रदेश सरकारले मुख्यमन्त्री वातावरणमैत्री नमूना कृषि गाउँको औपचारिक रुपमा शुरुवात गरेको थियो ।

प्रदेश सांसदको सिफारिशमा ‘एक निर्वाचन क्षेत्र एक नमूना कृषि गाउँको रुपमा विकास गर्ने गरी गण्डकी प्रदेशमा अहिले ३६ वटा निर्वाचन क्षेत्रमा ३६ वटा वातावरणमैत्री कृषि फार्म सञ्चालन भएको छ । कास्कीको रुपा गाउँपालिका वडानं ३ पोल्याङमा रहेको वातावरण मैत्री फार्म सांसद कोइरालाको सिफारिशमा गण्डकी प्रदेशको भूमि ब्यबस्था कृषि तथा सहकारी मन्त्रालयले आर्थिक सहयोगमा फार्म सञ्चालनमा आएको हो । सभापति कोइरालाले स्थानीयलाई फार्ममा पूर्वाधार निर्माण भएकोले अब ब्यवसायिक उत्पादनमा लाग्न आग्रह गरे ।

सांसद कोइरालाले किसानलाई परेको समस्या के छन भन्ने जिज्ञासामा किसानले प्राविधिकको अभाव भएको बताएका थिए । प्राविधिकको अभावमा आफूहरुलाई समस्या भएको पूर्वाधारको कामपनि केही पुरा हुन बाँकी रहेको गुनासो किसानको थियो । सांसद कोइरालाले मन्त्रालयसंग समन्वय गरेर केही दिनमा प्राविधिकको व्यवस्था गर्ने आश्वासन दिएका छन् ।

रुपा गाउँपालिकाका अध्यक्ष नवराज ओझाले अवलोकनपछि फार्म ब्यवस्थित रुपमा सञ्चालन गर्न आग्रह गरे । आफू बेलाबेलामा निरीक्षणमा आउने बताउदै अध्यक्ष ओझाले अन्यठाउँको भन्दा राम्रो फार्म सञ्चालन गर्न आग्रह गरे । उक्त कृषि फार्ममा दुई समूहले बंगुर पालनसंगै प्लाष्टिक घर भित्र गोलभेंडा खेती गर्दे आएका छन ।