रुपनारायण ढकाल, पोखरा, ३० भदौ । प्रशस्त सम्भावना बोकेर पनि प्रचारप्रसार अभावमा कास्कीको भदौरेले पर्यटनमा फड्को मार्न नसकेको स्थानीय व्यवसायीले दुःखेसो पोखेका छन् । कास्की, स्याङ्जा र पर्वत संगमस्थल पञ्चासेको प्रवेशद्वारको रुपमा भदौरेले पहिचान बनाएको छ ।
पञ्चासे आफैंमा ऐतिहासिक, धार्मिक तथा पर्यटकीय हिसाबले महत्वपूर्ण ठाउँ रहेको र सोही स्थलको काखैमा रहेर पनि भदौरेले पर्यटनमा उल्लेखनीय विकास गर्न नसकेको भदौरे पञ्चासे पर्यटन प्रवद्र्धन समिति अध्यक्ष एवं स्थानीय होटलकर्मी आशबहादुर गुरुङले सुनाए ।
विभिन्न प्रजातिका चरा, मृग, बाँदर, कालिज, परम्परागत मन्दिर, भयरथान, झाँक्रीथान, बराहथान, देवीथान, भूमेथान, छन्द्री छहरा, छाराप्रि छहरा, गुरुङ हिल, बाघको आकृति देखिने ढुंगा, गुरुङ संग्रहालय, फेवा तालको दृष्य र अन्नपूर्ण हिमश्रृंखलाको दृष्य जस्ता आकर्षणसँग भदौरे क्षेत्र जोडिएको छ ।
गाउँमा रहेको गुरुङ हिलबाट दुर्लुङ, बाजुङ, हलहले, देउपुर, क्याङ, लेस्पार, सल्यान, तिलाहर लगायत क्षेत्र देख्न सकिने व्यवसायी गुरुङले जानकारी दिए । भदौरेमा बस्न र खानाको कुनै समस्या छैन । चार वटा गेष्टहाउस र ३ सामुदायिक होमस्टेअन्तर्गत दर्जनौं सदस्यले पर्यटकलाई सेवा दिँदै आएका छन् । होटलमा सादा खानाको प्रतिछाक १ सय ८० रुपैयाँ, मासु सहितको खाना ३ सय र १ रात सुतेको १ सय रुपैयाँ लिने गरिएका गुरुङले सुनाए ।
भदौरेबाट पञ्चासे साढे ३ घण्टा पैदल दुरीमा पर्दछ । पञ्चासेमा सतवीज छर्न र बालाचतुर्दशी मेला भर्न जानेहरु अघिल्लो साँझ भदौरेमा रात काट्न पुग्ने गरेका छन् । अन्य अवस्थामा पनि स्वदेशी र विदेशी पर्यटक भदौरे घुम्न पुग्ने गरेको स्थानीय व्यवसायी सन्तबहादुर गुरुङले जानकारी दिए ।
पञ्चासे र भदौरे क्षेत्र प्रवद्र्धनका लागि भदौरे युवा क्लबले गाउँमा विगतदेखि मेला समेत गर्दै आएको उनले सुनाए । स्थानीय व्यवसायी रुपेश गुरुङ, समाजसेवी जीवन गुरुङ, सक्रीय युवा आइन्दल गुरुङ, ताइकाजी गुरुङ लगायत अन्य व्यक्तित्वहरुले समेत गाउँको प्रवद्र्धन र विकासमा भूमिका खेल्दै आएका छन् । कोरियाको ७ वर्षे जागिरे जीवन छाडेर स्थानीय युवा मोहन गुरुङले गाउँमै आएर होटल चलाएका छन् । पञ्चासे दक्षिणपट्टि भञ्ज्याङ भन्ने ठाउँमा पनि पर्यटकका लागि केही होटल तथा घरहरु रहेका छन् ।
पोखराको हरिचोकबाट निजी वा सार्वजनिक सवारी साधनमा नौडाँडा वा काँडे पुगी भदौरेसम्म र त्यसपछि पैदलयात्रा गरी पञ्चासे पुग्न सकिन्छ । पोखराको लेकसाइडबाट पामे, घाँटीछिना हुँदै भञ्ज्याङसम्म पनि मोटरयात्रा गरी पञ्चासे धामका लागि पैदलयात्रा तय गर्न सकिन्छ । अर्कोतर्फ पर्वतको आर्थर र स्याङ्जा जिल्लापट्टिबाट समेत पञ्चासे पुग्न सकिन्छ ।
समुद्री सतहबाट २ हजार ५ सय ९ मिटर उचाइमा रहेको पञ्चासेमा हिउँद याममा हिउँसमेत पर्ने कारण यो ठाउँ चिसो छ । पञ्चासेको थाप्लो वरपर कुनै मानव वस्ती छैन, जंगलमात्र रहेको छ । पञ्चासे निकै कम पर्यटक डुलेको ठाउँ भएका कारण पनि यहाँ आउने पर्यटकले नौलो अनुभव लिन सक्ने स्थानीय बासिन्दा बताउँछन् ।
पञ्चासेको विशेषता भनेको नजिकबाट प्रष्ट हिमश्रृंखला अवलोकन गर्न पाइनु हो । जैविक विविधता, १ सय बढी प्रकारका सुनगाभा र विभिन्न खालका लालीगुराँस अवलोकन यहाँ गर्न पाइन्छ ।
पञ्चासेको थाप्लोभन्दा तलपट्टि एउटा ठूलो धार्मिक पोखरी समेत रहेको छ । यसले पनि पर्यटकलाई लोभ्याउने गरेको छ । सूर्योदय र सूर्यास्तको दृष्य पनि निकै आकर्षक देखिन्छन् यहाँबाट । जैविक विविधता, वन वातावरण, स्थानीय सँस्कृति र खानामा रमाउनको लागि पछिल्लो समयमा भदौरे र पञ्चासे जाने आन्तरिक तथा बाह्रय पर्यटकको आकर्षण समेत बढ्दै गएको स्थानीय व्यवसायी आइतसिरी गुरुङले सुनाइन् ।
पञ्चासे टाकुरामा शिद्धबाबा, धर्मशाला, महादेव, भ्यू टावर, चौबीसे राज्यकालीन गढी र बुद्धका मूर्ति छन् । पञ्चासे क्षेत्र ५ हजार ५ सय हेक्टर क्षेत्रफलमा फैलिएको छ । यो क्षेत्र योग र ध्यानका लागि समेत उपयुक्त मानिन्छ । पञ्चासे क्षेत्र अन्नपूर्ण संरक्षण क्षेत्र आयोजना भन्दा बाहिर पर्ने कारणले यहाँ प्रवेशका लागि पर्यटकले कुनै अतिरिक्त शुल्क तिर्नुपर्दैन ।
Related News
सम्बन्धित समाचार
चोटिलो बन्दै गण्डकीको संसदीय राजनीति
पुरानो पोखरा जोगाउन पहल: मेयर आचार्य
सुदुरपश्चिममा सोडारी मुख्यमन्त्री नियुक्त
प्रेमील गजलकारको भावपूर्ण बिदाइ
अधिवेशन आह्वानप्रति कांग्रेसको आपत्ति, द्वन्द्व निम्तिन सक्ने चेतावनी
hero news full width
मुख्य समाचार
गण्डकी प्रदेश सभाको अधिवेशन आह्वान
गण्डकीमा अधिवेशन डाक्न सिफारिस, मुख्यमन्त्रीले विश्वासको मत लिँदै
वैशाख ५, २०८१दृष्टिविहीनलाई बाटो देखाउँदै गुगल
वैशाख ४, २०८१प्रकट पगेनी ‘शिव’ को निधन
वैशाख ४, २०८१कामचलाउ मुख्यमन्त्री अधिकारी विश्वासको मत लिने तयारीमा
वैशाख ४, २०८१फेरि बढ्यो पेट्रोल, डिजेल र मट्टितेलको भाउ
वैशाख ३, २०८१