लेखनाथ, १७ भाद्र । रुपा गाउँपालिका–७ स्थित हाँसपोखरी यूवा क्लबले तीजको अवसरमा आयोजना गरेको खुल्ला तीजगीत प्रतियोगितामा कुसुम हेल्थ क्लब प्रथम भएको छ ।

प्रतियोगितामा द्धितीय, तृतीय तथा सान्त्वना स्थान क्रमशः हाँसपोखरी दलित दिदी बहिनी समुह, हाँसपोखरी साथी संगिनी समुह र ईशानेश्वर मावि क्लबले हासील गरेका छन् ।

पुरस्कारको राशि क्रमश प्रथम, द्धितीय, तृतीय तथा सान्त्वना हुनेलाई क्रमशः ८ हजार १ सय, ४ हजार १ सय, २ हजार १ सय र १ हजार १ सय रहेको थियो । उक्त पुरस्कारको रकम देश तथा विदेशमा रहेका आफ्नो गाँउको र संस्कृतिको माया भएका व्यक्तिहरुबाट प्राप्त भएको थियो ।

इन्द्रेणी आधारभुत विद्यालयको प्राङ्गणमा सम्पन्न उक्त प्रतियोगिताका विजयी समूहलाई रुपा गाउँपालिकाका अध्यक्ष नवराज ओझाले पुरस्कार वितरण गरेका थिए ।

कार्यक्रममा विशिष्ट अतिथिको रुपमा रहेका वडा नं.७ का वडा अध्यक्ष दयासागर सुवेदीले रहेका थिए । तीज गीत प्रतियोगितामा १२ समूहको सहभागिता रहेको थियो ।