पोखरा, ९ भदौ । पोखराको सामाजिक क्षेत्रमा विशेष गरी सफाइ अभियानमा निकै सक्रिय रहेको खहरे आमा समूहले जेष्ठ आमाहरुलाई सम्मान गरेको छ । हरितालिका तीजको अवसरमा ७० वर्ष उमेर समूह माथिका ७ जना जेष्ठ आमाहरुलाई सम्मान गरेर तीज मनाएको हो ।

सम्मानित हुनेहरुमा रमा थापा, मंगली जलारी, चन्द्रकला पहारी, मैया थापा, शोभाकला पहारी र लक्ष्मी पोख्रेल, नानीमाया सिग्देल छन् । उनीहरुलाई समूहका अध्यक्ष मैया थापाले दोसल्ला ओढाएर सम्मान गरेकी थिइन् ।

“तीज मान्ने र मनाउने सोच र प्रवृत्ति निकै फरक आएको छ । पर्वलाई सामाजिक क्षेत्रसँग जोडेर मनाउन सक्नर्पछ” समुहका अध्यक्ष मैया थापाले भनिन् । जेष्ठ आमाहरुका मौलिक तीजे गीत र उनीहरुका अनुभवबाट पछिल्लो पुस्ताले धेरै कुरा सक्ने उनको भनाइ थियो ।

सम्मानित आमा मंगल जलारीले “आफ्नो पालामा दुख गरेर पनि पेटभरी खान पाइदैनथ्यो, कोही कसैसँग बोल्न पनि आँट नआउने त्यो जमाना अहिले निकै फेरिएको छ ।” सबैले सुख शान्तिले बाँच्न पाउनु पर्छ भन्ने आफ्नो चाहाना रहेको जलारीले बताइन् ।

कार्यक्रम खहरे टोल विकास संस्थाका अध्यक्ष खिमलाल पहारी , उपाध्यक्ष गणेश पहारी, कानूनी सल्लाहकार सूर्यप्रसाद तिमिल्सिना, राधादेवी पहारी, मनु अधिकारी, समुहका उपाध्यक्ष सावित्री तिमिल्सिना र सचिव पम्फा थापाले पर्वको महत्व र महिमाको बारेमा प्रकाश पार्दै पर्वलाई रचनात्मक र सकारात्मक उन्मुख बनाएर एक अर्काप्रतिको आत्मीयतालाई बढाएर जानु पर्ने बताएका थिए ।