राजधानी काठमाण्डौमा रहेको इन्टरनेट तथा डिजिटल केबल टिभी सेवा प्रादायक कम्पनी सुविसुको मुख्य कार्यालयमा आगलागी भएपछि पोखरामा क्लियर टिभीको प्रसारण अवरुद्ध भएको छ । सुविसुको इन्टरनेट र क्लियर टिभीको संकेतलाई काठमाण्डौबाट अप्टिकल फाइबरले तानेर पोखरा उपत्यकामा पोखरा इन्टरनेट तथा अर्मला केबल टिभीले   एउटै तारबाट प्रसारण गर्दै आएका छन् । पोखरा भरि हाल क्लियर टिभी पूर्ण अवरुद्ध भएको छ भने इन्टरनेट भने कुनै ग्राहकको चल्ने त कसैकोमा नचल्ने समस्या देखिएको पोखरा स्थित कार्यालयले बताएको छ । बालुवाटार स्थित मुख्य कार्यालयको जेनेरेटर कक्षमा रहेको डिजल भण्डारबाट दिउँसो १२ बजेदेखि लागेको आगलागी शुरु भएको थियो । नेपाल प्रहरी,सशस्त्र प्रहरी, नेपाली सेना तथा स्थानीयको सहयोगमा आगोलाइ दिउँसो १ः३० मा नियन्त्रणमा लिइएको थियो । काठमाण्डौ स्थित सुबिसुको कल सेन्टरमा सम्पर्क राख्दा सेवा शुरु हुन कति समय लाग्छ भनेर भन्न नसकिए पनि सम्पूर्ण प्राविधिक टिम अवरुद्ध सेवा खुलाउन लागिपरेको जानकारी प्राप्त भएको छ ।