पोखरामा गुड्ने सार्वजनिक यातायातमा यात्रुसँग मनलाग्दी भाडा असुलेको भन्दै विद्यार्थीले नियन्त्रणको माग गरेका छन्।

नेकपानिकट अनेरास्ववियु कास्कीका नेता शेखर गौतमको नेतृत्वमा गएको विद्यार्थी टोलीले सोमवार गण्डकी प्रदेश सरकारका भौतिक पूर्वाधार विकास मन्त्री रामशरण बस्नेतलाई ज्ञापनपत्र बुझाउँदै यस्तो माग गरेका हुन्।

लामो तथा छोटो दुरीका सवारीसाधननमा यसअघि प्रदान गर्दै आएको ज्येष्ट नागरिक, अपांगता भएका, विद्यार्थी र जनआन्दोलनका घाइते लगायतलाई दिइएको छुट कायम राख्न माग गरिएको छ।

साथै, पोखरामा चल्ने माइक्रो र ट्याक्सीले यात्रु ठग्ने गरेको भन्दै विद्यार्थीले लामो समयसम्म यातायात क्षेत्रमा अनुगमन नगरिएकोमा टिप्पणी गरे।

यात्रुसंग १० किलोमिटरको दुरीमा ४० रुपैयाँसम्म भाडा असुल गरिएको, पोखरादेखि काठमाडौंसम्मको भाडादर ४ सय २८ रुपैयाँ रहेकोमा डिलक्स र सुपरडिलक्स बसले त्यसको २० प्रतिशतसम्म थप लिन पाउनेमा यात्रुसँग २ हजार २ सयसम्म असुल गरिएको भन्दै कारबाही माग गरिएको छ।

लामो दुरीको यातायातका साधनमा अनिवार्य दुई जना चालक राख्नुपर्नेमा सो नपाइएकोले त्यस्ता सवारीसाधनको रुट परमिट खारेज गर्न माग गरिएको छ।

सो अवसरमा मन्त्री रामशरण बस्नेतले यातायात क्षेत्रमा धेरै नै समस्या रहेको स्वीकार गरे। ट्याक्सीमा मिटर चलाउनेदेखि धेरै समस्याबारे व्यवसायीसँग बस्दा निकास ननिस्केकाले नयाँ ढंगले समाधान उपाय खोजी गरिँदैगरेको बताए।

प्रतिक्रिया