लमजुङ,२० साउन । जिल्ला प्रहरी कार्यालय मनाङले सदरमुकाम स्थित चामे गाउँपालिकामा नागरिक सुनुवाई आयोजना गरेको छ । प्रमुख जिल्ला अधिकारी रुद्रनाथ देवकोटाको प्रमुख आतिथ्यतामा सो कार्यक्रम गरिएको हो ।

प्रजिअ देवकोटाले प्रहरी बर्दीका र नागरिक बिनावर्दीका प्रहरी भएकाले अपराधिक क्रियाकलाप र विकृति विसंगति विरुद्ध सवै एकजुट भएर अघि बढ्नुपर्नेमा जोड दिए । उनले विपद् व्यवस्थापन, सवारी दुर्घटना, शान्ति सुरक्षा लगायतका विषयमा गम्भीर हुन प्रहरीलाई आग्रह गरे ।

चामे गाउँपालिका अध्यक्ष लोकेन्द्रबहादुर घलेले प्रहरीको शान्ति सुरक्षा तथा अपराध नियन्त्रण अभियानमा स्थानीय प्रतिनिधिले सहयोग गर्ने प्रतिवद्धता व्यक्त गरे । प्रहरी नायव उपरीक्षक टीकाबहादुर कार्कीले प्रहरी नागरिकको शान्तिसुरक्षा, अपराधिक क्रियाकलाप नियन्त्रण तथा विकृति विसंगतिविरुद्धको अभियानमा रहेकाले यसतर्फ योजनाबद्ध ढंगले अघि बढेको बताए । उनले प्रहरीका सवै अभियानमा नागरिकको सहयोग र साथको आवश्यक रहेको बताए ।

कार्यक्रमका सहभागीले पछिल्ला समय जघन्य अपराधिक क्रियाकलाप तथा घटना दुर्घटना नभए पनि कुनैपनि समय अपराधिक क्रियाकलाप हुन सक्ने र घटना दुर्घटना हुन सक्ने भन्दै त्यसतर्फ सचेत बन्न प्रहरीलाई सुझाव दिएका छन् । कार्यक्रममा सहभागिले विपद व्यवस्थापन र सवारी दुर्घटना, घटना अनुसन्धानको सूचना, समुदाय–प्रहरी साझेदारीको अवधारण, चामे तिमाङमा अस्थायी प्रहरी चौकी स्थापना, चोरीका घटना हुन नदिन प्रहरीको योजना तथा पर्यटक सुरक्षा सम्बन्धी जिज्ञासा राखेका थिए । स्थानीयले प्रहरी विकृति विसंगति रोकथामका लागि प्रहरीले योजनाबद्ध ढंगले लाग्न आग्रह गर्दै नागरिकका तर्फबाट साथ दिने प्रतिवद्धता जनाएका छन् ।

चामे गाउँपालिका– ४ स्थित आमा समूहको सहभाहलमा आयोजित नागरिक सुनुवाईमा प्रहरी निरीक्षक प्रकाश भुसालले स्वागत मन्तव्य राख्दै कार्यक्रमको उद्देश्यका बारेमा प्रकाश पारेका थिए । कार्यक्रमको सञ्चालन प्रहरी नायव निरीक्षक महेन्द्र पोख्रेलले गरेका थिए ।