लमजुङ, ८ साउन । लमजुङका सात स्थानीय तह अझै दमकल बिहीन छन् । दमकल बिहीन सात स्थानीय तहमध्ये तीनवटा नगरपालिका हुन् ।

आगलागीका घट्ना जुनसुकै बेला पनि हुन सक्छ । गर्मी याम तथा हावाहुरी चल्ने समयमा बढी आगोलागीका घटना घट्ने हुने गरेका छन् । आगोलागीका घटना भएको खण्डमा त्यसको नियन्त्रणको पहिलो आधार भनेको दमकल हो । तर लमजुङमा रहेका आठ वटा स्थानीय तहमध्ये सातवटामा दमकलको व्यवस्था छैन । जिल्लामा रहेका आठ स्थानीय तह मध्ये बेसीशहर नगरपालिकासँग मात्रै आगलागी नियन्त्रणका लागि दमकलको ब्यवस्था छ । अन्य स्थानीय तहमा आपत परेको बेलामा अत्यावश्यक दमकलको व्यावस्था छैन ।

सुन्दरबजार नगरपालिकाको पाँच वटा वडामा दमकलले राम्रो सेवा दिन सक्ने अवस्था छ । ती वडा हुन्– ५ देखि ९ सम्मका वडाहरू । ती वडामा शहरीकरणको चाप बढ्दो छ । तर साँघुरो गल्ली राखेर निर्माण गरिएका घरका कारण दमकल भएपनि सेवा भने राम्रोसँग दिन सक्ने अवस्था छैन ।

दमकल रहेको बेसीशहर नगरपालिकाको शहरी क्षेत्रमा समेत साँघुरा सडकका कारण दमकलको सहज आवागमनमा बाधा उत्पन्न हुने गरेको स्थिति छ । एकमहिना अघि बेसीसहर नगरपालिका– ८ को सेराकुनामा भएको एक आगलागीमा ४ सय मिटरको दुरीको जिल्ला प्रहरी कार्यालयमा रहेको दमकल वडानं– ७ को पुरानो बैंक चोक, बुद्ध चोक हुँदै आउँनु पर्दा ५ मिनेटभन्दा बढी समय लागेको थियो ।

त्यस्तै, दमकलको सेवाका लागि दक्ष जनशक्ति नहुँदा कतै आगलागी भएको खण्डमा तत्काल सेवा प्रभावित हुने गरेको छ । जसका कारण बेलामा कहिले ढिलो पुग्ने त, कहिले बेलैमा पुगेपनि दमकलबाट पानि निकाल्न समय लगाउने भएकाले नगरको दमकल छिटो, छरितो र गुणस्तरीय सेवा प्रवाह हुन नसकेको स्थानीय दिपेन्द्र श्रेष्ठले बताए । यस बारेमा बेसीसहर नगरपालिकाका नगर प्रमुख गुमानसिंह अर्यालले घटना घटेको ढिलो जानकारी भएको बेला र कुनै कुनै बेला प्राविधिक समस्या भएको बेला बाहेक अन्य समयमा आगोलागी भएको स्थलमा चाडै र दक्ष कर्मचारीनै पठाउने गरिएको बताए । उनका अनुसार ठूलो आगोलागी घट्ना भएको बेला अन्य स्थानीय तहले हाम्रै नगरकै दमकल प्रयोग गर्ने गरेका छन् ।

चार गाउँपालिकाका सडकसमेत कम भएका कारण तत्काल दमकलको आवश्यक नदेखिए पनि नगरपालिकाहरूमा भने आवश्यकता खड्किन थालेको छ । तर यसबारेमा नगरपालिकाहरूले कुनै योजना बनाएका छैनन् । यसबारेमा सुन्दरबजार नगरपालिकामा सम्पर्क गर्दा दमकल त किन्न भन्दा पनि पाल्न कठिन रहेछ, हाम्रो जस्तो आन्तरिक आय कम भएको नगरपालिकाले कसरी त्यो धान्ने ? भन्छन् मेयर जनकराज मिश्र । उनले भने, ‘तर पनि यो आवश्यकता हो। आउँदो वर्षका लागि किन्ने योजना बनाउने सोच छ ।’

त्यस्तै, आफ्नो नगर क्षेत्रमा दमकल प्रयोग गर्ने शाखा सडक नै बन्न बाँकी छ, ठूलो आगलागीको जोखिम कम छ र आगोलागी भई हाले बेसीशहर नगरपालिकाकै दमकल प्रयोग गर्ने गरेको राइनास नगरपालिकाका प्रमुख सिंहबहादुर थापाले बताए । जिल्लाका अन्य सात स्थानीय तहले दमकल खरिद गर्ने कुनै तयारी नगरेको जिल्ला समन्वय समितिका प्रमुख लोकराज पाण्डेले बताए ।

जिल्लामा सानो आगोलागी हुँदा दमकल बिनै प्रहरीले आगो नियन्त्रण गर्ने गरेको र ठुलो आगलागी हुँदा प्रहरी बेलैमा पुगे पनि दमकल पुग्न समय लाग्ने भएकाले क्षति बढी हुने गरेको जिल्ला प्रहरी कार्यालयले जनाएको छ । प्रहरीको अनुसार, सबै स्थानीय तहमा दमकलको ब्यवस्था भएमा आगलागीबाट हुने धनजनको क्षति कम हुनेछ ।लमजुङमा रहेका स्थानीय तहमा चार नगरपालिका र चार गाउँपालिका रहेका छन् ।