पोखरा । बेलायतकी हक्की टोली र पोखराको हक्की टोलीले पोखरामा शुक्रबार मैत्रीपूर्ण खेल खेलेका छन् ।

पोखरा रंगशालाको हक्की खेल मैदानमा भएको मैत्रीपूर्ण खेलको संयोजन नेपाल हक्की संघका उपाध्यक्ष हिमाल खड्काले गरेका थिए ।

केही दिन अघिमात्रै बेलायतको हक्की खेलाडीहरुले हाई अल्टिच्युट मुस्ताङको बारागुङ मुक्ति क्षेत्र गाउँपालिका–२, छुङ्खुर पाखोमा हक्की खेलेर झरेका हुन् । ५ हजार १९९ मिटर अग्लो विश्वकै हाई अल्टिच्युटमा हक्की खेलेको सम्भवतः यो पहिलो पटक हो ।

गिनिज बुक अफ अल रेकर्डमा नाम दर्ता गराउने उद्देश्यले बेलायती हक्की टोलीले हाई अल्टिच्युटमा हक्की खेलेको थियो । उनीहरुले हक्कीमा नयाँ रेकर्ड बनाएको दाबी गर्दै आएका छन् । त्यहाँ उनीहरुले एक घण्टा हक्की खेले । केहीलाई लेकसमेत लाग्यो । हक्की खेल हेर्न गाउँबाट दर्शकहरुलाई बटुलिएको थियो ।

पथ प्रदर्शकहरु खड्ग पन्त (शम्भु) र राजेन्द्र पन्तले हक्की टोलीलाई त्यहाँ पु¥याएका थिए । सम्भवत विश्वमा नै पहिलो पटक यति उचाई हाई हल्टिच्यूड भएको ठाउँमा हक्की पहिलो पटक खेलिएको हो । त्यहाँ हक्कीको पूर्वाधार भएर पनि होइन । थियो त केबल घरपझोङ गाउँपालिका ४ मा अवस्थित जनहित माध्यमिक विद्यालयको परिशर । दर्शक समेत गाउँ बाट बटुलियो ।

अन्तर्राष्ट्रियस्तरमै हक्की खेलको प्रर्वद्धन तथा विकास गर्ने उद्देश्यसहित इङल्यान्डका ३१ हक्की खेलाडीको टोली नेपाल आएको हो । उनीहरुलाई पथप्रर्दशक, व्यवस्थापन र समन्वयमा नरबा ट्रेक एन्ड एक्सप्रेसनले मिलाएको हो । हक्की फर हिरोजका डेबी ग्रेग्सन् सहितको टोली नेतृत्वमा १४ खेलाडी र लिंकन मिनिस्टर स्कूलका १७ हक्की खेलाडी छन् । हक्की टिचरमा हक्की फर हिरोज क्लबका जो फोरेस्टर र लिंकनका टोम इप्स र रिचर्ड इस्टन छन् ।

गण्डकी प्रदेश सरकारले मुस्ताङमा हाइ अल्टिच्युड तालिम केन्द्रको पूर्वाधार बनाउनका लागि डिपिआर गर्न बजेट विनियोजन गरेको छ । टोलीले मुस्ताङमा हक्कीको अनुभव समेत लिएको एडभेन्चर लाइभ साइन्सका इन्चार्ज डेबी गे्रग्सनले बताए । उनले जोमसोममा विद्यालयका विद्यार्थीलाई पनि हक्कीको अभ्यास गराएको जानकारी दिए । टोलीले मुस्ताङपछि पोखरामा अभ्यास र प्रर्वद्धनात्मक कार्यक्रम गर्ने जनाएको छ ।

तस्वीर : सुदर्शन रञ्जित