बुटवल २० असार । गुल्मी जिल्लाको धुर्कोट गाउँपालिकाले आफ्नो पालिकामा रहेका जेष्ठ नागरिकलाई रेडियो सेट र लौरो वितरण गरेको छ ।

पालिकाहरुमा भैरहेको कार्यप्रति आलोचना वढिरहेका वेला धुर्कोटले सानो तर लोकप्रिय कार्यक्रम गरेको । गाउँपालिकाले आफ्नो क्षेत्रका सात वटै वडाका झण्डै दुई सय जेष्ठ नागरिकलाई यी सामाग्री वितरण गर्ने जनाएको छ ।

पालिकाका प्रमुख भूपाल पोख्रेलले बृद्धबृद्धालाई रेडियो र लौरो साहारा हुने मान्यता रहेकोले यस्तो कार्यक्रम गरिएको बताए । पालिका भित्र रहेका ७५ वर्ष माथिका बृद्धबृद्धालाई पायक पर्ने स्थानमा वोलाएर यि सामाग्री वितरण गरिएको उपाध्यक्ष शिव केसीले जानकारी दिए ।

उनका अनुसार पालिका भित्रका ७५ वर्ष माथिका दुई सयको हाराहारीमा जेष्ठ नागरिक रहेकोले सोही अनुसार कार्यक्रम थालिएको बताए । पहिलो चरणमा बिहिबार पालिकाको कार्यालय नजिक २८ जना जेष्ठ नागरिकलाई रेडियो र लौरो वितरण गरियो । दुई चार सयमै आउने लौरो र रेडियो पाएका जेष्ठ नागरिकहरुले भने निकै खुशी देखिएका थिए । उनीहरुले पालिकाले आफुहरुलाई सम्मान गरेको प्रतिक्रिया समेत दिएका छन् । पालिकाको नयां कार्यालय निमार्ण गरेर प्रदेशमै पहिलो दावी गरेको छ ।