पोखरा, १८ असार । रोटरी क्लव अफ पोखरा न्यूरोडको १० औँ स्थापना दिवस सम्पन्न भएको छ । उक्त कार्यक्रममा सन् २०१९–२० का लागि दिनेश बास्तोलाको अध्यक्षतामा नयाँ कार्यसमिति चयन गरिएको छ ।

सन् २०१० डिसेम्बर २४ तारिखका दिनबाट शुरु भएको रोटरी क्लव अफ पोखरा न्यूरोडले आफ्नो ६ वटा प्रमुख क्षेत्रहरुमा केन्द्रित रहेर सामाजिक सेवा प्रदान गर्दै आएको कुरा संस्थापक अध्यक्ष रोटरीयन रबि प्रसाद बरालले बताए ।

रोटरी क्लब अफ पोखरा न्यूरोडले स्थापनाकाल देखि नै बाबा फाउण्डेसन नेपालसँगको सहकार्यमा बालबालिका र वातावरणको क्षेत्रमा उल्लेखनीय कार्यहरु गर्दै आइरहेकाले उक्त संस्थालाई सम्मान गरिएको हो ।

कार्यक्रमका प्रमुख अतिथि तथा डिस्ट्रिक गभर्नर इलेक्ट राजीव पोख्रेलले यस संस्थाले सम्पन्न गरेका कार्यक्रमहरु प्रति खुशी व्यक्त गर्नुका साथै कार्यक्रमहरु रणनीतिक रुपमा विकास गर्दै लैजानका लागि शुभकामना दिए ।

कार्यक्रममा संस्थाका निवर्तमान अध्यक्ष पुष्पकमल पौडेलले आफ्नो कार्यकालमा गरेका सामाजिक कार्यहरु प्रस्तुत गर्नुका साथै संस्थाका सदस्यहरुलाई सम्मान गरे ।
अध्यक्ष दिनेश वास्तोलाले आगामी दिनहरुमा संस्थाले पोखरा तथा वरीपरिका क्षेत्रहरुमा शिक्षा, स्वास्थ्य, सरसफाई, वातावरण, सामुदायिक विकास इत्यादि क्षेत्रहरुमा गर्ने योजनाहरु प्रस्तुत गरे ।