जिल्लाको मालिका गाउँपालिका–४, च्यूरीबोट र ओखरबोटका कृषकलाई व्यावसायिक तरकारी खेतीसम्बन्धी तालिम दिइएको छ।

गाउँपालिकाको आयोजना र कृषि शाखाको प्राविधिक सहयोगमा तरकारी खेतीलाई व्यावसायिक बनाइ किसानको आयआर्जनमा टेवा पुर्याउने उद्देश्यले तीनदिने तालिम संचालन गरिएको हो।

किसानलाई जैविक खेतीमा आकर्षित गर्न तालिम प्रदान गरिएको कृषि शाखा संयोजक खेमराज भट्टले जानकारी दिए।

च्यूरीबोटमा आयोजित तालिम उद्घाटन गर्दै गाउँ कार्यपालिका सदस्य मनरुपा घर्तीले कृषिलाई व्यावसायिकरुपमा जोड दिन सकेमा किसानको आयआर्जनमा सहयोग पुग्ने बताइन्। उनले बेमौसमी तरकारी उत्पादनका लागि गाउँपालिकाले सिँचाइ आयोजनालाई जोड दिएको बताइन्।

तालिममा वडा ४ का कृषि प्राविधिक गणेश चोखाल र संयोजक भट्टले सहजिकरण गरेका छन्। दुवै तालिममा ७० जना सहभागी थिए।

ओखरबोटमा संचालित तालिम कार्यपालिका सदस्य उदवीर रसाइलीले उद्घाटन गरेका थिए। तालिममा उन्नत जातको तरकारीको बीउबिजन वितरण गरिएको छ।

तालिममा व्यावसायिक तरकारी खेतीको सम्भावना र चुनौती लगायत तरकारी खेतीसम्बन्धी जानकारी गराइएको थियो।