लमजुङ, १३ असार । लमजुङको सुन्दरबजार नगरपालिका– २ परेवाडाँडाका स्वास्थ्य आमा समूहले कोषमा जम्मा गरेको रकमबाट फिल्टर खरिद गरेका छन् । आमाहरूले पानी शुद्धीकरण गरेर खानुपर्ने महत्व बुझेपछि फिल्टर खरिद गरेका हुन् ।

सरसफाई तथा स्वास्थ्यको बारेमा जानकारी पाएका समूहमा आवद्ध आमाहरूले पानी शुद्धिकरण गरेर खानुपर्ने महत्व बुझेपछि फिल्टर खरिद गरेको बताएका छन् । पूर्ण सरसफाईका सूचक मध्ये पानी शुद्धिकरण गरी पिउने एक सूचक भएको हुँदा यो कार्य गरिएको स्वास्थ्य आमा समूहका अध्यक्ष सम्झना श्रेष्ठले बताइन ।

उनका अनुसार कोषमा जम्मा भएको रकमबाट ३० वटा फिल्टर खरिद गरिएको छ । ३० घरका लागि ३७ हजार ५०० रुपैयाँमा खरिद गरी प्रति घर एक एकवटाका सदरले वितरण गरिएको उनले भनिन् ।

सुन्दरबजार नगरपालिका– २ का अध्यक्ष जगतबहादर खड्काले एक कार्यक्रमका बीच आमाहरुलाई फिल्टर वितरण गर्नुभएको हो । खड्काले स्वच्छ पानी पिउनु पर्ने र अशुद्ध पानी पिएमा विभिन्न रोग लाग्ने बताए । वडाले गाउँगाउँमा सरसफाई र स्वास्थ्य सम्बन्धी सचेतना कार्यक्रम तथा योजना बनाएको उनको भनाई छ ।

सुआहारा कार्यक्रमका सरसफाई अधिकृत रोशन चौलागाइँले उक्त ठाउँमा सरसफाई सम्बन्धी कार्यक्रमलाई तिब्रता दिएको बताए । परेवाडाँडा भित्रका विभिन्न स्वास्थ्य आमा समूहरुमा सरसफाई सम्बन्धी अभिमुखिकरण कार्यक्रम सञ्चालन गरिएसंगै स्वास्थ्यप्रति सचेत भएको उनले जानकारी दिए ।

सुन्दरबजार कार्यपालिका सदस्य शान्ता भुजेल, ग्रामीण साुमदायिक विकास केन्द्र (आरसीडीसी) का कार्यकारी निर्देशक प्रेमबहादुर भट्टराई, वडा सदस्य पुनकुमार श्रेष्ठ लगायतले हरेक नागरिकले पानी फिल्टर गरेर पिउनुपर्नेमा जोड दिए । उनीहरूले रोगबाट बच्न वातावरणीय, व्यक्तिगत सरसफाई र स्वच्छ खानेपानीमा ध्यान दिनुपर्ने बताए ।