पोखरा,८ असार । सानै उमेरदेखि उनले दुःख पाइन, ति दुःख संघर्षपूर्ण कार्यमा लगाउदै अगाडि वढिन्, समाजमा केही गर्नुपर्छ भन्ने भावना उनमा जाग्यो र उनले १३ बर्षको उमेरदेखि नै संघर्षपूर्ण जीवनसँगै समाज सेवाको बाटो पनि रोजिन र उनले जीवन समाज सेवाको बाटो नै बन्यो ।

झापामा जन्मिएकी इन्दिरा रानामगरले रोजिन दुःख पाएका र अनाथ वालवालिकको सेवा गर्ने बाटो । अहिले उनी देशमा वन्दी जीवन विताएका परिवारका वालवालिकाको पालन पोषण र शिक्षादीक्षा दिने कार्यमा तल्लिन छन् ।

४३ बर्षीया रानामगरले सामाजिक सेवा गर्न थालेको तीस बर्ष पुगेको छ । अहिले पनि उनको होम केयर सेन्टरमा अनाथ तथा जेलमा वन्दी विताइरहेका व्यक्तिका २०५ आश्रित वालवालिकालाई जेलबाट छुटाएर आवासीय रुपमा पालनपोशण र शिक्षादीक्षा प्रदान गरेकी छन् भने तीन सय जनालाई शिक्षादीक्षामा सहयोग ।

बन्दी सहायता नेपाल (पिए नेपाल) संस्थापक इन्दिरा रानामगर आइतवार पोखरा आइपुगेकी छन् । दाङ जिल्लाको कारागारमा चार जना वालवालिका आश्रित छन् भन्ने सूचना उनले पाइसकेकी छन् । उनी ती वालवालिकाको उद्धारका लागि आइतवार पोखराहुूदै दाङ हानिएकी छन् ।

पोखरा वस्दा आइतवार उनले पोखराको मासवार स्थित स्टेप वाई स्टेप वोडिङ स्कूकलमा विद्यार्थीलाई आफ्नो संघर्षपूर्ण जीवन र समाजिक सेवामा पुर्याएको योगदानको चर्चा गरिन् । विद्यालयका विद्यार्थीसंग अन्तरक्रिया गर्दै उनले भनिन्– जतिसुकै दुःख परेपनि आफ्नौ शैक्षिक योग्यतालाई अघि वढाउन ।

मानिसका जीवनमा अनेकौ प्रकारका दुःख कष्ट पर्छन ती दुःख कष्टलाई पन्छाउदै अगाडि वढ्न समेत उनले विद्यार्थीलाई आग्रह गरिन् । समाज सेवा र आत्म निर्भरतर्फ विद्यार्थी जुट्नु पर्छ उनले भनिन् । उक्त अवसरमा विद्यालयका संस्थापक रमाकान्त बराल र विद्यालयका प्राचार्य निर्मला बराल लगायतले आफ्नो आफ्ना भनाई राखेका थिए।