लगातार दुई खेल जित्दै साविक विजेता चिली कोपा अमेरिका २०१९ को क्वाटरफाइनलमा प्रवेश गरेको छ ।

समूह ‘सी’ मा रहेको चिलीले एक खेल अगाडि नै अन्तिम आठमा स्थान पक्का गरेको हो ।

ब्राजिललमा भइरहेको प्रतियोगितामा चिलीले शनिवार बिहान सम्पन्न खेलमा इक्वेडरलाई २–१ ले पराजित ग¥यो । चिलीको लागि जोस फुएन्जनलिडा र एलेक्स सान्चेजले एक/एक गोल गरे । इक्वेडरका लागि इनर भ्यालेन्सियाले एक गोल फर्काए । ८९ औं मिनेटमा गाब्रीएल एचिलरले रातो कार्ड पाएपछि इक्वेडर दश खेलाडीमा झरेको थियो ।

यसअघिको लिगचरणमा चिलीले जापानलाई पराजित गरेको थियो । लगातार दुई जितपछि चिलीको ६ अंक छ । यस्तै, दुई खेलबाटै उरुग्वेको ४ अंक छ । अब, अन्तिम खेलमा चिली र उरुग्वेबीच प्रतिस्पर्धा हुनेछ । यस खेलमा विजयी हुने टिम समूह विजेता बन्नेछ ।

उरुग्वेसंग बराबरी मात्र खेलेपनि चिली समूह विजेता बन्नेछ । उरुग्वे विजयी भएमा भने उरुग्वे समूह विजेता र चिली समूह उपविजेता हुँदै क्वाटरफाइनल पुग्नेछ । तेस्रो स्थानको जापानले पहिलो अंकको खाता खोलेको छ ।

यस संस्करणमा १२ टोलीलाई ३ समूहमा विभाजन गरिएको छ । तीनवटै टोलीको समूह विजेता र समूह उपविजेता सिधै क्वाटरफाइनल पुग्नेछन् । यस्तै, तेस्रो हुने तीन मध्ये उत्कृष्ट दुई टोलीले पनि क्वाटरफाइनलमा स्थान बनाउनेछ ।

यसअघि, दक्षिण अमेरिकी फुटबलको बलियो टिम उरुग्वेलाई एसियाली फुटबलको पावर हाउस जापानले २–२ को बराबरीमा रोक्न सफल भएको छ । कोपा अमेरिकाको फुटबलमा समूह ‘सी’ कै उरुग्वे र जापानले बारबरी खेल्दै अंक बाँडेको छ । समूह चरणको खेलमा उरुग्वे र जापानले २–२ गोलको बराबरी खेलेको थियो ।

खेलको २५ औं मिनेटमा कोजी मियोशीको गोलबाट जापानले अग्रता लिएको थियो । गाकु शिबासाकीको क्रस बललाई सदुपयोग गर्दै मियोशीले टोलीलाई अग्रता दिलाएका थिए । ३२ औं मिनेटमा लुइस स्वारेजले पेनाल्टीमा गोल गर्दै खेललाई बराबरीमा ल्याएका थिए ।

मियोशीले व्यक्तिगत दोस्रो गोल गर्दै ५९ औं मिनेटमा पुनः जापानलाई अग्रता दिलाएका थिए । ६६ औं मिनेटमा जोस जिमेनेजले उरुग्वेका लागि बराबरी गोल फर्काए ।