म्याग्दी, ३१ जेठ । स्वास्थ्य कार्यालय म्याग्दीले पोषणको अवस्था पहिचानका लागि गरिएको सर्वेक्षण प्रतिवेदन बिहीबार बेनीमा सार्वजनिक गरेको छ ।

सामाजिक विकास मन्त्रालयको अति विपन्न गर्भवती महिला तथा बच्चाहरुको पोषण सुधार कार्यक्रम अन्तरगत गत बैशाख २४ देखि जेठ ३ गतेसम्म ५ वर्ष मुनिका बालबालिका गर्भवती र सुत्केरी आमाको पोषण अवस्थाको बारेमा सर्वेक्षण गरिएको थियो ।

३७० जना महिला स्वास्थ्य स्वमसेविका र ३७० जना स्वास्थ्यकर्मी परिचालन गरिएको सर्वेक्षणमा सात हजार एक सय २५ जना लक्षित बालबालिका र महिला सहभागी थिए । सर्वेक्षणका लागि एमयुएसई टेपको माध्यमबाट पाखुराको नामले पोषणको स्थिति पत्ता लगाइने बिधि प्रयोग गरिएको थियो ।

सर्वेक्षणमा सहभागी छ हजार ४५९ जना ६ महिनादेखि ५ वर्षमुनीका बालबालिका मध्य पोषणका हिसाबले दश जना अति जोखिम र ९७ जना जोखिममा रहेको पाइएको स्वास्थ्य कार्यालयका प्रमुख भीम आचार्यले बताए ।

उनका अनुसार सर्वेक्षण गरिएका ६६६ जना गर्भवती र सुत्केरी मध्ये ७ जना अति जोखिममा र २९ जना जोखिममा रहेको पाइएको छ । पाखुराको नाप अनुसार गर्भवती, किशोरी, बच्चा र सुत्केरीहरुलाई तीन वटा समूहमा विभाजन गरिने भएको छ ।

पोषण अवस्था राम्रो भएकालाई हरियो, कमजोर हुदै गएकालाई पहेलो र कुपोषितलाई रातो रंगको वर्गमा सूचिकृत गरिएको कार्यालय प्रमुख आचार्यले जानकारी दिए । व्यक्ति–व्यक्तिको वडागत रुपमा तयार पारिएको सर्वेक्षण प्रतिवेदन सम्बन्धित स्थानीय तहलाई उपलब्ध गराइने भएको छ ।

जिल्ला समन्वय समिति प्रमुख देवेन्द्र केसीको अध्यक्षता भएको कार्यक्रममा गण्डकी प्रदेशका सांसद बिनोद केसीले पोषण सुधारका लागि लक्षित व्यक्ति र समुदाय पहिचान गर्न सर्वेक्षणले सहयोग गरेको बताए । पोषण सुधारका लागि आवश्यकता अनुसार व्यवहार परिवर्तन, खानपान र स्वास्थ्य सेवामा पहुँच बढाउने किसीमका कार्यक्रम प्रस्ताव गरिएको छ ।