तानसेन नगरपालिका र बगनासकाली गाउँपालिकाका जनप्रनिधि विमानस्थल निर्माणको लागि विहीवार सम्भाव्यता अध्ययनमा जुटेका छन्। विकास र नीति निर्माणमा अन्तरकार्यपालिकास्तरीय सम्झौता गरेका तानसेन र बगनासकालीका प्रतिनिधि विमानस्थलको सम्भाव्यता अध्ययन गर्न जुटेका हुन्।

बगनासकालीको बराङ्दी र नायरमा विमानस्थलका लागि सम्भाव्यता अध्ययन शुरु भएको हो। बगनासकाली गाउँपालिका कार्यालयमा सम्भाव्यता अध्ययन क्षेत्रको अनुगमनपश्चात फर्किएका एक सदस्यले भने, ‘भर्खर सम्भावित क्षेत्रमा पुगेर आयौं, विकासका लागि सम्भाव्यता अध्ययन गर्ने दुई पालिकाको सम्झौताबमोजिम नै संयुक्त रूपमा सम्भाव्यता अध्ययनको लागि पुगेका हौं। ’

बगनासकाली गाउँपालिका स्रोतका अनुसार अध्ययन टोलीमा नेकपाका केन्द्रीय सदस्य ठाकुर गैरे, तानसेन नगरापालिकाका प्रमुख अशोककुमार शाही, बगनासकाली गाउँपालिकाका अध्यक्ष कृष्णप्रसाद बस्याल, उपाध्यक्ष सरस्वती चिदी (दर्लामी) नेकपाका कृष्ण भुसाल, राजेन्द्र विश्वकर्मा, स्थानीय सरोकारवाला सहभागी थिए।

तानसेन नगरपालिकाका प्रमुख अशोककुमार शाहीले सञ्चारकर्मीलाई दिएको जानकारीअनुसार पाल्पामा विमानस्थलको आवश्यकता महसुस गरी सम्भावित क्षेत्रको अध्ययन शुरु गरिएको हो। उनले एक महिनाभित्रमै प्राविधिकको सहयोग लिएर प्रक्रिया शुरु गरिने जनाए। जिल्लामा विमानस्थलको सम्भाव्यता अध्ययनको लागि यसअघि पाल्पा छलफल र अन्तरक्रिया उठेका थिए।

दुई कार्यपालिकाको विकास र नीति निर्माणमा साझारूपमा अगाडि बढ्ने सहमति भएको २४ घण्टा नबित्दै भएको पहलाई शुभसंकेतको रूपमा हेरिएको छ। नेपालमा आधिकारिकरूपमा विमानको आरम्भ सन् १९४९ मा एक लोन ४–मिटर बीचक्राफ्ट बोनाञ्जा विमानको अवतरणबाट शुरु भएको लामो इतिहास भए पनि पाल्पामा यसलाई विशेष मानिएको छ।

वुधवार तानसेन नगरपालिकामा बसेको दुवै स्थानीय तहका कार्यपालिका सदस्यको संयुक्त बैठकले विमानस्थल निर्माणको लागि सहकार्य गर्ने लगायत ८ बुँदे महत्वपूर्ण निर्णय गरेको थियो। अन्तरकार्यपालिकास्तरको सहकार्य जिल्लामा यो पहिलो प्रयास हो।