विश्वकप क्रिकेटको इतिहासमा इङल्याण्डले बंगलादेशलाई १२ वर्षपछि हराएको छ।

शनिबारको अर्को खेलमा घरेलु टोली इङ्ल्याण्डले बंगलादेशलाई १ सय ६ रनको फराकिलो जित हात पारेको थियो।

यसअघि सन् २००७ विश्वकपमा बंगलादेशलाई पराजित गरेको इङल्याण्डले सन् २०११ र सन् २०१५ को विश्वकपमा बंगलादेशसँग हारेको थियो।

इङल्याण्डलाई बिशाल जित दिलाउन जेसन रोएले सानदार शतक जोडे। टस हारेर ब्याटिङको निम्तो पाएको इङल्याण्डले निर्धारित ५० ओभरमा ६ विकेट गुमाएर ३ सय ८६ रन जोड्दा रोए एक्लैले १ सय ५३ रनको इनिङ्स खेले।

खेलको प्लेयर अफ दि म्याच चुनिएका रोएले १ सय २१ बलमा १४ चौका र ५ छक्कासहित १ सय ५३ रन जोड्न सफल रहे। रोएसँगै जोनी बेयरस्ट्रोकले ५१ रन जोड्दा इङल्याण्डले १ सय २८ रनको ओपनिङ साझेदारी पाएको थियो।

बंगलादेशको बलिङमा मोहम्मद सैफुदीन र मेहेदी हसनको नाममा समान २ विकेट रहेपनि सबै बलरहरु महँगो साबित भए। जवाफमा ३ सय ८७ रनको विजयी लक्ष्य लिएर मैदान उत्रिएको बंगलादेशले ४८ दशमलव ५ ओभरमा सबै विकेट गुमाउनु अघि २ सय ८० रनमात्र जोड्न सक्यो। उसको चेजमा शाकिब अल हसनले शतक बनाएपनि अन्य ब्याट्सम्यानले खास योगदान दिन सकेनन्।

१ सय १९ बल खेल्दै १२ चौका र १ छक्कासहित शाकिबले १ सय २१ रन जोडे। यस्तै, मुश्फिकुर रहिमले ४४ र महाम्दुल्लाले २८ रन जोडे पनि जितका लागि पर्याप्त भएन। इङल्याण्डको बलिङमा जोफ्रा आर्चर र बेयर स्ट्रोक्सले समान ३ विकेट हात पारे। य मार्क वुडको नाममा २ विकेट रह्यो।