बागलुङ, २७ वैशाख । नेपाली कांग्रेसका केन्द्रीय सदस्य शंकर भण्डारीले नेपाललाई हिन्दुराज्य बनाउनु पर्नेमा जोड दिएका छन् ।

नेपाल प्रेस युनियन बागलुङद्वारा शुक्रवार आयोजना गरेको पत्रकार भेटघाट कार्यक्रममा उनले भने– नेपाललाई अब हिन्दु राज्य बनाउनु पर्छ भन्ने पक्षमा म छु । आफ्नो कांग्रेसको आउदो महाधिवेशनले हिन्दु राष्ट्रको मुद्दालाई अघि वढाउने विश्वास उनले व्यक्त गरे ।

नेपाली कांग्रेस लोकतान्त्रिक पार्टी भएकाले देश र जनताको लागि सधै लड्ने बताए । वि.स. २००७ साल २०४६ सालको आन्दोलन, १० बर्षीय माओवादी जनयुद्वलाई शान्तिपूर्ण तरिकाले अवतरण गराउन काँग्रेस नै सफल भयो, उनले भने– नयाँ संविधान निर्माण निर्माणमा पनि काँग्रेसले प्रमुख भूमिका खेल्यो ।

नेपाली कांग्रेसले शुरु गरेको जागरण अभियानको मुख्य उदेश्य पार्टी सुदृढीकरण र सरकारले गरेको गलत क्रियाकलापको भण्डाफोर गर्ने रहेको उनले बताए । मुलुकमा नेकपाको दुई तिहाइको सरकार छ, तर यसले देश र जनताको लागि केही गर्न नसकेको आरोप भण्डारीको थिए ।

नेपाली कांग्रेस जागरण अभियान बागलुङ संयोजक समेत रहेका भण्डारीले एनसेल प्रकरणबाट राजस्व छलि भएको छ यसबारे छानबिन गरेर कर लिनुपर्ने भण्डारीले बताए । नागरिकता प्रकरण पछि मधेसमा लाइनमा राखेर नागरिकता दिने काम गलत हो तर गृहमन्त्रीको ठाडो निर्देशनमा नागरिकता दिने काम भएको समेत भण्डारीले बताए ।

नेपाली कांग्रेसका जिल्ला सभापति दीपेन्द्र बहादुर थापाले बागलुङ जिल्लाका १० वटै स्थानीय तहमा एक महिने जागरण अभियान बारे जानकारी गराएका थिए । पत्रकार भेटघाट कार्यक्रमको अध्यक्षता नेपाल प्रेस युनियन बागलुङका अध्यक्ष प्रदीप पन्त गरेका थिए ।