पोखरा, १८ वैशाख। पोखराको पृथ्वीचोकस्थित नीलकमल होटलमा मंगलबार साँझ ३ जना भारतीय बासका लागि आए।

भारतीय नम्बर प्लेटको गाडी लिएर साँझ ५ :५० बजे आएका उनीहरुले त्यही खाना खाएर र सो रात त्यही बिताए।

भोलिपल्ट होटलका रकम चुक्ता गर्नुपर्ने भो। तर आफूहरुसँग रकम नपुग नभएकोले एटीएमबाट निकाल्ने भन्दै काउन्टरमा जानकारी गराए। सो खबर होटल संचालक शालिकराम पौडेलसमक्ष पुग्यो।

आफूहरुसँग एसबीआई बैंकको एटीएम रहेको र पोखराको छोरेपाटनस्थित बैंकको एटीएमबाट रकम निकालेर चुक्ता गर्ने होटल संचालकलाई बताए।

छलफलपछि ती भारतीयले पत्यार नलागे होटल संचालक पौडेललाई नै आफ्नै गाडीमा जान र छोरेपाटनमा पुगेपछि रकम दिएर फिर्ता गर्ने भन्दै बुधबार बिहान ८ बजे गाडीमा बसाए।

भारतीयहरु चढी आएको बीआरवान सीडब्लु ५२७४ नम्बरको भारतीय नम्बर प्लेटमा जब छोरेपाटन कट्यो, उनीहरुले एक्कासी गाडीबाट होटल संचालक पौडेललाई भुइँमा खसाइदिए। र, गाडी बेगसँग स्याङ्जातिर हुइँक्याए।

घटनापछि पौडेलले सोको जानकारी प्रहरीसमक्ष गरेपछि छोरेपाटनस्थित प्रहरी चौकीको टोलीले सिद्धार्थ राजमार्गअन्तर्गत सडकखण्डको स्याङ्जाबाट तत्काल सो भारतीय नम्बर प्लेटको गाडीसहित तीन भारतीयलाई पक्राउ गर्न सफल भयो।

यता, जिल्ला प्रहरी कार्यालय कास्कीका प्रमुख प्रहरी उपरीक्षक ओमबहादुर रानाले अपत्यारिलो ढंगले भएको सो घटनाबारे अनुसन्धान जारी रहेको जानकारी दिए। प्रहरीले पक्राउ पर्ने ३ भारतीयको नाम भने गोप्य राखेको छ।