पोखरा, ११ वैशाख । पृथ्वी राजमार्ग अन्तर्गत पोखरा–२६ स्थित बुढीबजारमा बसको ठक्करबाट मोटरसाइकल चालकको मृत्यु भएको छ ।

मङ्गलबार राति ८ः४५ बजे पोखराबाट दमौली जाँदै गरेको यात्रुबाहक बसको ठक्करबाट गम्भीर घाइते पोखरा–२७ खरानेफाँट निवासी ४२ वर्षीय टीकाराम तिमिल्सेनाको उपचारको क्रममा मृत्यु भएको जिल्ला प्रहरी कार्यालय कास्कीका प्रहरी नायव उपरीक्षक एवं प्रहरी प्रवक्ता रवीन्द्रमान गुरुङले जानकारी दिए ।

ग ६प ३०२९ नं को मोटरसाइकलमा सवार तिमिल्सेनालाई बसले ठक्कर दिएपछि गम्भीर घाइते भएका थिए । पोखरा स्वास्थ्य विज्ञान प्रतिष्ठान अन्तर्गत पश्चिमाञ्चल क्षेत्रीय अस्पतालमा उपचारकै क्रममा उनको मृत्यु भएको छ । तिमिल्सेनालाई ठक्कर दिने बस नम्बर खुल्न सकेको छैन । ठक्कर दिने बसको खोजी कार्य भइरहेको कास्की प्रहरीले जानकारी दिएको छ ।