पोखरा, ८ बैशाख । कास्कीको पश्चिमी रुपाकोट–थुम्की सडक निर्माण सम्पन्न गरी हस्तान्तरण गर्न नपाउदै भत्किएको छ ।

पोखरा र रुपाकोट गाउँपालिकाको सीमाना खोला छेउबाट सुरु हुने सडकको ठाउँठाउँमा भत्किएर माटो देखिएको छ । रुपाकोटदेखि थुम्कीसम्मको सडक १३ किलोमिटर लम्वाईको छ । सडक भत्किएपछि स्थानीयले गाउँपालिकामा सूचना गरेका छन् ।

अलकत्रा बढी परेर टायरलाई समातेपछि सडक भत्किएको हुन सक्ने गाउँपालिका अध्यक्ष नवराज ओझाले बताए । ‘प्राविधिक कुरा हो । हामीलाई खासै थाहा हुँदैन, उनले भने–तर बढी अलकत्रा परेका कारण भत्किएको अनुमान छ । हामी हेर्न जाँदै छौं ।’
बर्षौअघि फेल खाईसकेको ओटाशील प्रणालीको पीच एसएनआरटिपी मार्फत कास्कीमा पुनः सुरु भएको थियो । यो सडक पनि सोही परियोजना मार्फत ओटाशील गरिएको हो । विनियोजित १६ करोड मध्ये ठेकेदारले १३ करोड रुपैयाँमा सडक पीच गर्ने ठेक्का पाएको थियो ।

ठेकेदारको लापरबाहीकै कारण सडक भत्किएको स्थानीयको आरोप छ । ‘बनेको महिनादिन पनि भएको छैन । यति छिटो कसरी भत्किन्छ ?, उनीहरुले भने– ठेकेदारको लापरबाहीका कारण सडक कमजोरहुँदा निर्माण गर्न नपाउदै भत्कियो । सडकको काम पूरा नभएकोले अहिले नै आत्तिनुपर्ने अवस्था नरहेको सरकारी इन्जिनियर नारायण बरालले बताए ।

फाईनल पेमेण्ट पनि बाँकी छ, उनी भन्छन् विटुमीन बढी भएपछि व्लिडिङ हुन्छ । त्यो ठाउँमा बालुवा छर्किनुपर्छ । समस्या समाधान हुन्छ ।’ भत्किएको ठाउँमा ट्रिटमेण्ट गर्न मिल्ने बरालले बताए । खोलाको छेउबाट सुरु भएको सडक थुम्कीमा पुगेर टुंगिन्छ । निमार्ण कम्पनीको ठेकेदारसँग भने सम्पर्क हुन भने सकेको छैन ।