पोखरा, ५ वैशाख। साभ नेपाल नामक संस्थाले पोखरा–११, फूलबारीमा रहेको शिवशक्ति माविमा ‘विद्यालय रुपान्तरणमा प्रधानाध्यापक र शिक्षकको भूमिका’ विषयक अभिमुखीकरण कार्यक्रम गरेको छ।

विद्यालय प्रधानाध्यापक शम्भु बास्तोला सहित २५ जना शिक्षक शिक्षिका सहभागी रहेको उक्त कार्यक्रममा प्रमुख प्रशिक्षक किशोरदत्त बरालले विद्यालय प्रधानाध्यापक र शिक्षकहरूको रुपान्तरण, जीवनोपयोगी अथवा सफलताको सीपको विकास, सकारात्मक सोच लगायत विषयमा प्रशिक्षण दिए।

त्यसैगरी साभ नेपालका अध्यक्ष तुलसी प्रवासले शिक्षक हुनुको गौरव विषयमा प्रशिक्षण दिए। सो संस्थाले शिक्षाक्षेत्रसँग सम्बन्धित समस्या, नेतृत्व क्षमताको विकास, शिक्षकहरूमा विषयगत शिक्षण सीपको विकास आदिका लागि सशक्त तालिम सामग्रीहरू पनि उत्पादन गरिरहेको र हाललाई आफ्नो सचेतनामूलक कामको थालनी नेतृत्व विकास, बालमनोवैज्ञानिक समस्या र अभिभावकहरूको अपेक्षित भूमिका लगायतका विषयमा देशभरि नै विभिन्न तालिम तथा सेमिनार मार्फत गर्दै आएको छ।

शिक्षा क्षेत्रका विकृति झ्याङ्गिँदै गएका सामाजिक समस्या, हाम्रो मौलिक संस्कृतिले भोग्नुपरेको अस्तित्वको संकट, प्रतिकूल बन्दै गएको पर्यावरण, हाम्रा नानीबाबुहरूले झेलिरहेको मनोवैज्ञानिक समस्या र अभिभावकको अपेक्षित भूमिका, बिग्रँदो युवापुस्ता लगायत विषयसँग सामाजिक सचेतना अभिवृद्धि गरी आफूसक्दो टेवा पुर्याउने संस्थाको उद्देश्य रहेको जनाइएको छ।