Worldlink ads

शान्ति र विकासप्रति प्रधानमन्त्री प्रतिबद्ध, बेथितिविरुद्ध लड्ने सङ्कल्प

रासस
वैशाख १, २०७६
PRO_Ktm2

काठमाडौँ, १ वैशाख । नयाँ बर्ष २०७६ शुरु भएसँग प्रधानमन्त्री केपी शर्मा ओलीले जनताको अपेक्षा शान्ति, एकता र विकास रहेकाले त्यसप्रति आफू प्रतिबद्ध रहेको बताएका छन् ।

नववर्ष २०७६ का अवसरमा आइतवार विहान प्रधानमन्त्री निवासबाट राष्ट्रका नाममा सम्बोधन गर्दै उनले सुशासन र समृद्धिको बाधक भ्रष्टाचार र बेथितिविरुद्ध निरन्तर लडिरहने सङ्कल्प गरे ।

समृद्धि सुखको आधार हो, उच्च र दिगो उत्पादन÷उत्पादकत्व वृद्धिप्रति वर्तमान सरकारको एक मात्र उद्देश्य भएको बताउँदै प्रधानमन्त्रीले सामजिक न्याय सहितको समुन्नति आफूले चाहेको उल्लेख गरे ।

सबैखाले अतिवाद, अशान्ति, आतङ्क र गडबडीबाट देशलाई छिट्टै मुक्त गर्ने, लामो द्वन्द्व र सङ्क्रमणकाल अन्त्य भएसँग अब देश स्थायित्वको बाटोमा हिँड्न सुरु गरेका वेला अर्को हिंसाको दुष्चक्र किमार्थ स्वीकार्य नहुने र शान्तिपूर्ण रूपमा गरिने विरोध र असहमतिलाई हाम्रो संविधानले नै प्रत्याभूत गरेको बताए ।“अवाञ्छित प्रतिगामी प्रयासहरु र संविधान विरोधी गतिविधिहरु कडाइका साथ नियन्त्रण गरिनेछ ।”उनले भने ।

पुरानो वर्षलाई बिदाइ र नयाँ वर्षको स्वागत गरिरहँदा समयलाई हेक्का राख्न सबै नेपालीलाई आग्रह गर्दै प्रधानमन्त्री ओलीले आफ्नो नेतृत्वको सरकारले यसै कार्यकालमा देशलाई ‘अतिकम विकसित मुलुक’को टिठलाग्दो हैसियतबाट उकास्ने, सन् २०३० मा तोकिएको दिगो विकास लक्ष्य भेट्टाउने लक्ष्यका साथ काम गरिरहेको कुरा सुनाए ।

सुशासन कायम गर्न वर्तमान सरकार गम्भीर भएर लागेको तथा गत साल आफूले बेथिति र भ्रष्टाचारविरुद्धको अभियान नै सञ्चालन गरेको जानकारी दिँदै यो वर्ष पनि सुशासनलाई पहिलो प्राथमिकतामा राखेर काम गर्न आफू दृढ रहेको बताए ।
“सुशासन, परिष्कृत तथा मर्या्दित जीवन, सभ्य र न्यायपूर्ण समाज, स्वस्थ्य र सन्तुलित पर्यावरणीय पद्धति, सवल लोकतन्त्र, राष्ट्रिय एकता र सम्मान’ ‘सुखीपन’का सूचक हुन् । हामीले थालेको रोजगारी र लगानीका विभिन्न कार्यक्रमहरु समृद्धिका हिस्सा हुन् । सुशासन समृद्धिको लागि पूर्वशर्त हो ।”

Related News

सम्बन्धित समाचार

    hero news full width