पोखरा, २९ चैत । नयाँ वर्षको अवसर पारेर पोखराको फेवा किनारमा गर्न लागिएको ‘फेवा नव वर्ष महोत्सव २०७६’को तयारी पूरा भएको छ ।

पश्चिमाञ्चल होेटल सङ्घद्वारा आयोजना गर्न लागिएको उक्त महोत्सवको सम्पूर्ण तयारी पुरा भएको संघका अध्यक्ष विकल तुलाचनले जानकारी दिए । कोमागाने पार्कमा गर्न लागिएको उक्त त्रिदीवसीय १६ आंै संस्करणको महोत्सवमा खानाका परिकार, संस्कृति र संगीतलाई विशेष प्राथामिकता दिइएको छ । महोत्सव शुक्रवारदेखि सुरु हुदै छ ।

महोत्सवको अवलोकन पर्यटक र अन्य आगन्तुक गरी एक लाखको संख्याले गर्ने दावि आयोजक संस्थाले गरेको छ । महोत्सव स्थलमा२२ नेपाली खानाका परिकार,सांस्कृतिक झाँकी र गण्डकी प्रदेशस्तरीय नृत्य प्रतियोगिता आयोजना गरिने बताइएको छ । महोत्सवका अवसरमा सङ्घअन्तर्गतका सदस्य होटलको मेन्युमा १५ प्रतिशत छुट प्रदान गरिने जनाइएको छ ।

नेपाल पर्यटन बोर्डका गण्डकी प्रदेश कार्यालय प्रमुख मणि लामिछानेले भ्रमण वर्ष कार्यक्रम घोषणाको अन्तिम तयारी सकिएको बताए । गण्डकी प्रदेश सरकारले मनाइरहेको आन्तरिक पर्यटन वर्ष २०१९ लाई सफल बनाउनसमेत प्रदेश सरकारसँग बोर्डले समन्वय गरिरहेको कुरा लामिछानेले सुनाए ।