पोखरा, २७ चैत । म्याग्दीको धवलागिरि गाउँपालिका–४ मुदीको भीरबाट लडेर मङ्गलबार बेलुका एक जनाको मृत्यु भएको छ । मुदीको बगरस्थित तातोपानी कुण्डमा नुहाएर गाउँतिर फर्कने क्रममा खिवाङका जीतबहादुर पुनको मृत्यु भएको हो ।

मुदीको भीर धवलागिरि चक्रिय पदमार्गको सबैभन्दा जोखिमपूर्ण भीर हो । भीरबाट चिप्लेका पुन करीब ३०० मिटर तल खस्दा ज्यान गएको इलाका प्रहरी कार्यालय दरवाङले जनाएको छ । आफन्तसँगै तातोपानीमा स्नान गरेर फर्किदै गरेको अवस्थामा लडेर घटनास्थलमै मृत्यु भएको प्रहरी निरीक्षक रामप्रसाद पाण्डेले बताउनुभयो । पूर्वव्रिट्रिश आर्मी समेत रहेका पुन सेवानिवृत्त भएपछि सामाजिक क्षेत्रमा सक्रिय थिए ।