•  नेपालीको हाल प्रतिबर्ष प्रतिव्यक्ति १ हजार ४ डलर आय छ ।
•  पाँच बर्षपछि १ हजार ५ सय ८३ डलर ।
•  २५ बर्षे अवधिभित्र नेपालीको बार्षिक प्रतिव्यक्ति आय १२ हजार १ सय डलर ।
•  आयोगले पेश गरेको १५ औँ पञ्चवर्षीय योजनाको आधार पत्रमा लगानी बढाएर प्रतिव्यक्ति आय बढाउने लक्ष्य राखिएको छ ।
•  राष्ट्रिय योजना आयोगका अनुसार २५ वर्षमा दोहोरो अंकको आर्थिक बृद्धिदर हुने ।

पोखरा, २१ चैत । सरकारले आफ्नो योजनामा २५ बर्षे अवधिभित्र नेपालीको बार्षिक प्रतिव्यक्ति आय १२ हजार १ सय डलर पु¥याउने भएको छ, हाल प्रतिबर्ष १ हजार ४ डलर मात्र छ ।

पाँच बर्षपछि १ हजार ५ सय ८३ डलर हुँदै २५ बर्षभित्र १२ हजार डलर भन्दा बढी पु¥याउने योजना सरकारले अगाडि सारेको हो । राष्ट्रिय योजना आयोगले देशका सातवटै प्रदेश लिएको परामर्श वैठकमा नेपालीको प्रतिव्यक्ति आयलाई नै प्राथामिकतामा राखेको छ ।

राष्ट्रिय योजना आयोगले दीर्घकालिन सोचसहित तयार पारेको प्रतिव्यक्ति आय बृद्धिको योजनाले प्रतिव्यक्ति आय गुणात्मक रुपले बढ्ने देखाएको छ । आय वढ्नुमा नेपालको जलश्रोत, उद्योग, कृषि, पर्यटन, जडिवुटी क्षेत्रको विकासका आधारहरु वनाइएका छन् ।

काठमाण्डौमा बुधवारदेखि विकास परिषद्को दुई दिने बैठकमा आयोगले पेश गरेको १५ औँ पञ्चवर्षीय योजनाको आधार पत्रमा लगानी बढाएर प्रतिव्यक्ति आय बढाउने लक्ष्य राखिएको छ । २५ वर्षको अवधिमा नेपाललाई विश्वकै उच्च आर्थिक आय भएको मुलुक बनाउने उल्लेख त्यसमा गरिएको छ।

आयोगका उपाध्यक्ष डा. पुष्प कँडेलले पेश गरेको आधारपत्रमा ५ वर्ष अवधिमा ९ प्रतिशतको आर्थिक बृद्धिदर र २५ वर्षमा दोहोरो अंकको आर्थिक बृद्धिदर हुने उल्लेख छ। आगामी ५ वर्षको अवधिमा विभिन्न आयोजनामा ९७ खर्ब ७७ अर्ब लगानी गर्ने र सो अनुरुप प्रतिव्यक्ति आय बृद्धि हुने उल्लेख छ ।

उक्त लगानीमध्ये ३६ खर्ब ७४ अर्ब ५६ करोड रुपैयाँ सरकारले आफै लगानी गर्नेछ। त्यो लगानी कूल लगानीकोे ३७.६ प्रतिशत हुन्छ। र, सो भन्दा बाहेक विदेशी र निजी क्षेत्र तथा सहकारीबाट आउने अनुमान गरिएको छ । निजी क्षेत्रले ५६ खर्ब ८३ अर्ब ८८ करोड लगानी गर्ने प्रारम्भिक प्रक्षेपण गरिएको छ, जुन कूल लगानीको ५८.१ प्रतिशत हुनेछ। त्यस्तै, सहकारी क्षेत्रबाट ४ खर्ब १९ अर्ब ३१ करोड अर्थात् ४.३ प्रतिशत लगानी हुने आयोगले प्रक्षेपण गरेको छ।

२५ वर्ष अवधि नेपालको गरिवी सून्यमा झरिसक्ने आयोगको दावी छ। आयोगका अनुसार नेपालीको औषत आयु ७२ वाट वढेर ८० वर्ष नाघ्ने देखाइएको छ। २५ वर्ष सम्ममा ३३ हजार राष्ट्रिय तथा प्रादेशिक लोकमार्ग निर्माण गरिसक्ने छ। यसैगरी २५ बषभित्र फास्ट ट्रयाकमात्रै २ हजार निर्माण हुनेछन्। यसैगरी२ हजार २ सय किलोमिटर रेलमार्ग निर्माण, ४० हजार मेगावाट जलविद्युत उत्पादन गरिसक्ने सो आधारपत्रमा उल्लेख गरिएको छ।