पोखरा, २० चैत । जल तथा मौसम पूर्वानुमान महाशाखाले बुधबार देशको पूर्वी तथा मध्य भू–भागमा मेघ गर्जन र हावाहुरीसहित बर्षाहुने सम्भावना रहेको छ ।

दिउँसो देशको पूर्वी, मध्य पहाडी तथा पश्चिमी पहाडी भू–भागमा आंशिक देखि सामान्य बदली रहने महाशाखाकी मौसमविद् विभूति पोखरेलले जानकारी दिइन्।

साँझपख काठमाडौँ, पोखरा उपत्यकासहित मुलुकका धेरैजसो भू–भाग आंशिक बदली हुने सम्भावना रहेको छ, मौसमविद् पोखरेलले भनिन ‘प्रि–मनसुनको समय भएकाले मेघ गर्जनका साथ हावाहुरी र क्षणिक वर्षा हुने देखिन्छ ।

महाशाखाले बुधवार बिहान प्रकाशित गरेको तीन दिने मौसमी बुलेटिनमा पनि देशका विभिन्न भू–भागमा आंशिक देखि सामान्य बदली रहने उल्लेख छ। बिहीबार देशको पूर्वी, मध्य र पश्चिमी पहाडी भू–भागमा आंशिकदेखि सामान्य बदली र बाँकी भ–ूभागहरुमा आंशिक बदली रहने विभागले जानकारी दिएको छ ।

यसैबीच बारा र पर्सामा ठूलो धनजनको क्षति हुने गरी तीन दिनअघि आएको हावाहुरीबारे अध्ययन गर्न मौसमविद्सहितको टोली मंगलवार प्रभावित क्षेत्रमा पुगेको छ । महाशाखाकी मौसमविद् अर्चना श्रेष्ठ र सुजन सुवेदीसहितको टोली बिहान बाराको लागि प्रस्थान गरेको मौसमविद् विभुति पोखरेलले जानकारी दिइन्।

टोलीले प्रभावित क्षेत्रमा गएर घटनाको सामान्य अध्ययन गर्ने छ। मौसमविद्को टोलीले पीडित र स्थानीय प्रशासनसँग पनि छलफल गर्ने छ । यो अध्ययनले हावाहुरीको प्रकोपबाट हुन सक्ने क्षति कम गर्न सहयोग पुग्ने विभागले जनाएको छ।