पोखरा, १९ चैत। जीवनयोग प्रयोगशाला पोखराको आयोजनामा पोखरामा विशेष सत्संग हुने भएको छ।

विहीवार हुने सो कार्यक्रममा जीवन विकास विशेषज्ञद्धय गुरुदेव एलपि भानु शर्मा र रमेश नेपालको उपस्थिति रहने जीवनयोग प्रयोगशालाका अध्यक्ष गुणाखर सापकोटाले मंगलबार आयोजित पत्रकार सम्मेलनमा जानकारी दिए।

हाल प्रयोगशालामा दैनिक ४० देखी ५० जनाको संख्यामा उपस्थिति रहँदै आएकोमा सो दिन करिब ३ सयको सहभागिता रहने बताइयो।

योग, व्यायाम र ध्यानको माध्यमबाट स्वस्थ शरिरको निर्माण गर्दै सुख, शान्ति र समृद्धि हासिल गर्ने उद्देश्यले २०६७ सालमा जीवन विज्ञानको स्थापनासँगै देशका सातवटै प्रदेशमा गरी ६३ केन्द्रमा दैनिक योग, ध्यान र व्यायाम हुने गरेको छ।

‘प्रत्येक व्यक्तिभित्र बीज रुपमा रहेको आत्मविश्वास, स्वास्थ्य, नेतृत्व, समृद्धि र सफलताको सम्भावनालाई साकार पार्नु जीवन विज्ञानको उद्देश्य हो, ’ सापकोटाले भने।

गण्डकी प्रदेशका पोखरा, दमौली, नवलपरासी र स्याङ्जामा पनि प्रयोगशाला स्थापना गरिएको छ।

मानिसमा स्वास्थ्यसम्बन्धी सचेतना बढाउँदै ध्यान र प्राणायमको माध्यमबाट शारीरिक र मानसिक स्वस्थता हासिल गर्न सघाउने जीवनयोगको उद्देश्य रहेको प्रयोगशाला सदस्य गंगालाल पोखरेलले बताए।