पोखरा, १८ चैत । कास्कीका एक प्रदेश सभा सदस्यले आफूले प्राप्त गरेकोएक बर्षको मासिक पारिश्रमिक एवं बैठक भत्ता र अन्य सुविधा सामाजिक कार्यमा खर्चिएका छन् ।

नेपाली काङ्ग्रेसको तर्फवाट गण्डकी प्रदेशसभा सदस्य विन्दुकुमार थापाले विसं २०७४ माघ महीनादेखि २०७५ माघसम्म आफ्नो खातामा प्रदेशसभाबाट प्राप्त सात लाख नौ हजार १३५ सहित सामाजिक काममा १० लाख ५४ हजार ६५५ खर्चेको सोमवार बिहान पोखराका संचारकर्मी मार्फत जानकारी दिएका हुन् ।

आफ्नो निर्वाचन क्षेत्रअन्तर्गतका विभिन्न विद्यालय, क्लब, मठमन्दिर, बाजा समूह, टोल विकास संस्था आदिमा आफूले सहयोग गरेको दावि उनले गरेका छन् । यसका साथै आफ्नो पहलमा सङ्घ एवं प्रदेश सरकारबाट नमूना सडक, कृषि, बाटोघाटो, शिक्षण संस्थामा प्रयोगशाला लगायतमा विभिन्न योजना समावेश गरिएको उनले जिकिर गरेका छन् ।

विकास निर्माणमा यो वा त्यो पार्टी नभनी सबैको साथ र सहयोग आवश्यक हुने बताउदै उनले प्रदेशसभा निर्वाचन पछिको १६ महीनामा जनताका अपेक्षा पूरा हुन नसकेको भनाई उनको छ ।